भूकम्पका घाइतेलाई उपचार गर्न भेरी अस्पताल तयारी अवस्थामा

१८ कात्तिक, काठमाडौं । जिल्ला प्रशासन बाँकेले जाजरकोटमा भएको भूकम्प प्रभावित मानिसहरूको उपचारका लागि स्थानीय अस्पतालहरू र रक्तदातालाई तयारी अवस्थामा रहने प्रबन्ध गरेको जनाएको छ ।

प्रमुख जिल्ला अधिकारी श्रवणकुमार पोखरेलले भुकम्पका गम्भीर घाइतेको उपचारका लागि बाँके प्रशासनबाट बिहान ३.२१ बजेबाटै तयारी थालिएको जानकारी दिएका छन् ।

भेरी अस्पताल नेपालगन्जलाई उपचारको लागि मुख्य केन्द्र अस्पताल तोकिएको भने व्यक्तिगत पहलमा उपचारका लागि आउने घाइतेहरूको आफन्तजनको सहजताको लागि पनि नरेश श्रेष्ठलाई सम्पर्क व्यक्ति तोकिएको छ । उनको सम्पर्क नम्बर  ९८५११४३६६६ मा सम्पर्क गर्न भनिएको छ ।

कोहलपुर मेडिकल कलेजलाई तयारी अवस्थामा राखिएको छ भने नीजि अस्पतालहरूलाई पनि तयारी रहन भनिएको प्रमुख जिल्ला अधिकारी पोखरेलले जानकारी दिएका छन् । त्यसैगरी भेरी अस्पताल, सैनिक अस्पताल र प्रहरी अस्पतालको १०५ वटा बेड तयारी अवस्थामा राखिएको छ भने कोहलपुर मेडिकल कलेजलाई पनि तयारी अवस्थामा राखिएको जनाइएको छ ।

अस्पतालहरूमा पर्याप्त मात्रामा डाक्टर, नर्शिङ स्टाफ र लजिस्टिकको प्रबन्ध मिलाइएको जनाइएको छ । साथै हेलिकोप्टरबाट आउने बिरामीको लागि राँझा विमानस्थल र सेनाको हेलीप्याडमा २÷२ वटा एम्बुलेन्स तैनाथ गरिएको छ । त्यसैगरी ब्लडको मौज्दात रहेको छ भने अपुग भएमा फ्रेश ब्लड आपूर्तिको लागि रक्तदाता सुरक्षाकर्मीको व्यवस्था समेत मिलाइएको जनाइएको छ ।

भुकम्पमा गम्भीर घाइते भएका जाजरकोट भेरी नगरपालिका वार्ड नं. ३ खलंगाका ४८ वर्षिय विमलकुमार कार्कीलाई राती नै उपचारका लागि भेरी अस्पतालमा भर्ना गरिएको छ । उनी त्यहाँ आउने भूकम्प प्रभावित पहिलो विरामी हुन् ।