हालसम्म भूकम्पमा परी १३६ जनाको मृत्यु

१८ कात्तिक, काठमाडौं । भुकम्पका कारण जाजरकोट र रुकुम पश्चिममा थप ४ जनाको मृत्यु भएको छ । जाजरकोटमा ९८ जना र रुकुम पश्चिममा ३८ जनाको मृत्यु भएको कर्णाली प्रदेश प्रहरी कार्यालयले जनाएको छ । भुकम्पमा परेर मृत्यु हुनेको सङ्ख्या बढेर १ सय ३६ पुगेको छ ।

 जाजरकोटमा महिला ६९ जना र पुरुष २९ जनाको मृत्यु भएको छ । पश्चिम रुकुममा महिला १९ जना र पुरुष १९ जनाले ज्यान गुमाएका छन् । भुकम्पका कारण जाजरकोटमा ८१ जना र रुकुम पश्चिममा ७२ जना घाइते भएका छन् । 

जाजरकोटलाई केन्द्रबिन्दु गएर भुकम्प प्रभावित क्षेत्रमा पाँच निकायका चिकित्सकहरू खटिएका छन । प्रधानमन्त्री प्रचण्डको सचिवालयका अनुसार पहिलो काम उद्धार, उपचार र राहत भएकाले राज्यका सबै साधन श्रोत त्यसमा केन्द्रित गरिएको छ ।

हाल भुकम्प प्रभावित क्षेत्रमा वीर हस्पिटल, ट्रमा सेन्टर, नेपाली सेना, नेपाल प्रहरी र सशस्त्र प्रहरी अस्पतालका डाक्टरहरू स्वास्थ्य सामाग्रीसहित प्रभावित क्षेत्र पुगिसकेको सचिवालयले जनाएको छ । तत्काल उपलब्ध केही राहत सामग्री पनि हेलिकोप्टर र जहाजमार्फत पठाई सकिएको र उनीहरूले आफ्नो तर्फबाट काम सुचारु गरिसकेका छन् ।

उद्धार र राहतको लागि संघीय, प्रदेश तथा स्थानीय सरकारका सबै निकाय परिचालित भएको पनि प्रधानमन्त्रीको सचिवालयले जनाएको छ ।