पार्टीका सांसदहरुको १५ दिन बराबरको पारिश्रमिक भूकम्प पीडितलाई दिने कांग्रेस संसदीय दलको निर्णय

१९ कात्तिक, काठमाडौं । नेपाली कांग्रेसका सांसदहरुले १५ दिन बराबरको पारिश्रमिक भूकम्प पीडितलाई दिने भएका छन् । आइतबार बसेको कांग्रेस संसदीय दलको बैठकले भुकम्पबाट भएको जनधनको क्षतिप्रति दुख व्यक्त गर्दै सो रम दिने निर्णय गरेको हो । 

भूकम्प पीडितहरुको उद्धार, राहत र पुनःस्थापनाका लागि संघीय संसदमा नेपाली कांग्रेसका तर्फबाट प्रतिनिधित्व गर्ने सांसदहरुले सो बराबरको रकम दिने निर्णय भएको प्रमुख सचेतक रमेश लेखकले बताए । यस्तै कांग्रेसले भूकम्प प्रभावितहरूको राहत, उद्धार र पुनःस्थापनाका लागि पार्टीका तर्फबाट ५० लाख सहयोग दिने बताइसकेको छ । 

कांग्रेसको आगामी मंसिर १३ देखि काठमाडौंमा गर्ने भनेको महासमितिको बैठक पनि दुई साता पर सारेको छ । मंसिर २९ देखि पुस २ सम्म गोदावरीमा महासमितिको बैठक गर्ने कांग्रेसले जनाएको छ ।