कोशीका मुख्यमन्त्री कार्कीलाई एमाले समर्थन यथावत

२० कात्तिक, बिराटनगर । कोशी प्रदेशका मुख्यमन्त्री केदार कार्कीले नेतृत्व गरेको सरकारलाई दिएको समर्थन नेकपा एमालेले कायमै राखेको छ । यसअघि एमालेले समर्थन फिर्ता लिने बताइएको थियो । तर, कोशी प्रदेश सरकारलाई दिएको समर्थन फिर्ता नलिने निर्णय एमालेले गरेको छ । 

मुख्यमन्त्री केदार कार्कीले माओवादी केन्द्र र एकीकृत समाजवादीलाई सरकारमा सहभागी गराएपछि एमालेका मन्त्री राम रानाले शनिबार राजीनामा दिएका थिए । मन्त्रिपरिषद विस्तार गर्दा सत्ता गठबन्धनबाट मन्त्रीहरु नियुक्त गरिएपछि एमाले रुष्ट बनेको थियो । अहिले सरकारको कामको अवस्था हेरेर निर्णय लिने आवस्थामा एमाले पुगेको छ । 

सोमबार बसेको संसदीय दलको बैठकले तत्कालका लागि समर्थन फिर्ता नलिने निर्णय गरेको प्रमुख सचेतक रेवतीरमण भण्डारीले जानकारी दिए । सरकारबाट चाहिँ हामी फिर्ता भयौं, दिएको विश्वासको मत चाहिँ कायमै राख्ने निर्णय गर्यौं’ उनले भने, समर्थन कहिलेसम्म ? भन्ने कुराको सरकारको काम कारबाही र परिस्थिति हेरेर निर्णय गरिनेछ ।