निरन्तर ओरालो लागेको शेयरबजार दोहोरो अंकले बढ्यो

२० कात्तिक, काठमाडौं । केही दिनयता लगातार ओरालो लाग्दै आएको शेयरबजार सोमबार भने दोहोरो अंकले बढेको छ । गत साताको मंगलबारदेखि निरन्तर ओरालो लागिरहेको शेयरबजार सोमबार २१.३० अंकले बढेर १८४७.५४ विन्दुमा पुगेको छ ।

पछिल्ला चार कारोबार दिनमा ५२.४४ अंक घटेको थियो । तर, सोमबार भने बढेको शेयर बजारमा सेन्सेटिभ इण्डेक्स ३.८३ अंक बढेको छ भने फ्लोट इण्डेक्स १.३१ अंक र सेन्सेटिभ फ्लोट इण्डेक्स ०.९६ प्रतिशत बढेको छ।

सोमबार २८३ स्टकको ४७ हजार २३१ पटकको कारोबारमा ९३ करोड ८९ लाख २९ हजार रूपैयाँ बराबरको ३५ लाख ५५ हजार ६७० कित्ता शेयर किनबेच भएको छ।