सिंगो देश उद्धार र राहतमा : प्राधिकरणको कार्यकारी प्रमुख चाहि विदेशमा

२१ कात्तिक, काठमाडौं । देश भूकम्पको पीडामा छ तर, विपद् व्यवस्थापनको जिम्मेवारी बोकेको सरकारी निकाय राष्ट्रिय विपद जोखिम न्यूनीकरण तथा व्यवस्थापन प्राधिकरणका कार्यकारी प्रमुख अनिल पोखरेल भने जापान पुगेका छन् ।

शुक्रबार राति गएको भूकम्प पछि सिंगो देश उद्धार र राहतमा जुटेका बेला पोखरेलको भने त्यही शुक्रबार राती नै जापान गएका हुन् । यद्यपि उनी जापान जाने कार्यक्रम पुरानै भएपनि प्राधिकरणकै प्रमुख भएपछि भ्रमण छोट्याएर आउनु पर्नेमा उनी उतै रमाएर बसेका छन् । पोखरेल शुक्रबार राति साढे ११ बजे काठमाडौंबाट जापान गएका हुन । एक साता त्यहाँ रहने गरी जापान उडेका उनी भ्रमण छोट्याएर आएका छैनन ।

भूकम्पले पश्चिम नेपाल प्रभावित भएको सूचना उनले जापान नपुग्दै पाएका थिए । भूकम्प व्यवस्थापनकै विषयमा अध्ययन गर्न उनी जापान पुगेको भए पनि नेपाल भूकम्पकै पीडामा पर्दा उनले भ्रमण छोट्याएर फर्किने विषयमा चासो राखेको देखिदैन । विपद् जोखिम न्यूनीकरण तथा व्यवस्थापन प्राधिकरणका अनुसार भूकम्प तथा सुनामी विपद् व्यवस्थापनसँग सम्बन्धित विषयमा आयोजित अन्तक्र्रियामा सहभागी हुन उनी जापान गएका हुन ।

गृह मन्त्रालय स्रोतका अनुसार कार्यकारी प्रमुख पोखरेल हरेक महिनाजसो विदेश भ्रमणमा जान्छन । यसपटक उनी विदेशमै भएका बेला नेपालमा भूकम्प गएको हो । असोजमा पनि उनी गृहमन्त्री नारायणकाजी श्रेष्ठसँग चीन भ्रमणमा गएका थिए । यसैगरी भदौमा पनि उनको विदेश भ्रमण थियो । प्राधिकरणका सूचना अधिकारी धु्रवबहादुर खड्काले विपद् व्यवस्थापनसम्बन्धी अन्तर्राष्ट्रिय तहको कार्यक्रममा सहभागी हुन देशको प्रतिनिधित्व गर्दै पोखरेल जापान पुगेको बताए । प्रधानमन्त्रीले सम्बोधन गर्ने कार्यक्रममा पोखरेलको साटो सूचना अधिकारी खड्का सहभागी भएका थिए ।

पोखरेल २०७७ कात्तिकमा प्राधिकरणको कार्यकारी प्रमुखमा नियुक्त भएका हुन । त्यसयता उनले दर्जनौं पटक विदेश भ्रमण गरिसकेका छन । गृह मन्त्रालयका कर्मचारीहरूमध्ये उनी सबैभन्दा बढी विदेश भ्रमणमा जाने कर्मचारीका रूपमा चिनिन्छन । दराष्ट्रिय विपद जोखिम न्यूनीकरण तथा व्यवस्थापन प्राधिकरण भूकम्पलगायत विपद्को व्यवस्थापन तथा न्यूनीकरणका लागि नीति बनाउने, अनुगमन गर्ने, समन्वय गर्ने तथा विपद् जोखिम न्यूनीकरण र व्यवस्थापनका लागि केन्द्रीय स्रोत निकायका रूपमा काम गर्ने उद्देश्यबाट स्थापना भएको हो । २०७२ सालको भूकम्पपछि यसको स्थापना गरिएको हो ।

विपद् जोखिम न्यूनीकरण तथा व्यवस्थापन ऐन, २०७४ को दफा १० ले राष्ट्रिय विपद् जोखिम न्यूनीकरण तथा व्यवस्थापन प्राधिकरण स्थापनाको व्यवस्था गरेको हो । गृह मन्त्रालय मातहत रहने यस प्राधिकरणको कार्यालय सिंहदरबारमा छ । गत वर्ष डोटीमा भूकम्प गएको बेला पनि पोखरेल विदेशमै थिए । त्यतिबेला पनि उनी उतै बसेर समय कटाएका थिए । २३ कात्तिक ०७९ मा डोटीमा आएको ६।६ रेक्टर स्केलको भूकम्पमा ६ जनाको निधन भएको थियो ।

त्यतिबेला पोखरेल कोप २७ को कार्यक्रममा भाग लिन मेक्सिकोमा थिए । उक्त समयमा पनि उनी भ्रमण छोट्याएर नेपाल आएका थिएनन् । विपद् जोखिम न्यूनीकरण तथा व्यवस्थापन प्राधिकरण स्थापनाको नै यस्तै जोखिमको बेला काम गर्ने संस्थाको रुपमा जन्मिएका भएपनि त्यसको कार्यकारी प्रमुख नै विदेशमा रहनुले यसको औचित्यमाथि समेत प्रश्न उठेको छ ।