पर्यटन अन्तर्गतका निकायबाट राहत कोषमा ४ करोड जम्मा

२२ कात्तिक, काठमाडौं । संस्कृति पर्यटन तथा नागरिक उड्डयन मन्त्रालय अन्तर्गत विभिन्न निकायहरूले संयुक्त रुपमा प्रधानमन्त्री राहत कोषमा चार करोड रूपैयाँभन्दा बढी रकम जम्मा गरेका छन् । उनीहरूले बुधबार रकम जम्मा गरेको प्रधानमन्त्रीको सचिवालयले जनाएको छ ।

बुधबार बिहान प्रधानमन्त्री पुष्पकमल दाहाल प्रचण्डलाई भेटेर नेपाल नागरिक उड्डयन प्राधिकरण, पशुपति क्षेत्र विकास कोष, लुम्बिनी विकास कोष, नेपाल वायु सेवा निगम, नेपाल पर्यटन बोर्ड, नेपाल पर्वतारोहण संघ, बुद्ध एयर र विभिन्न हेलिकोप्टर कम्पनीहरूले चार करोड १३ लाख ९८ हजार रूपैयाँ बराबरको चेक हस्तान्तरण गरेको प्रधानमन्त्री प्रचण्डका प्रेस संयोजक सूर्यकिरण शर्माले जानकारी दिए ।

राहत रकम हस्तान्तरण कार्यक्रममा सँस्कृति पर्यटन तथा नागरिक उड्डयन मन्त्री सुदन किराँती पनि सहभागी थिए । यही कात्तिक १७ गते जाजरकोटको बारेकोट गाउँपालिका १ रामीडाँडा केन्द्रविन्दु भएर गएको भुकम्पबाट प्रभावित भएकाहरूलाई राहत तथा पुनःस्थापनाको कामका लागि सरकारले प्रधानमन्त्री राहत कोषमा रकम जम्मा गर्न सबैलाई आह्वान गरेको थियो । 

सोही आह्वान बमोजिम विभिन्न राजनीतिक दल, दलका संगठन, सरकारी तथा गैरसरकारी कार्यालय, संघसंस्था, बैंक तथा वित्तीय संस्था, उद्योगी व्यवसायी र कर्मचारीहरूले राहत रकम जम्मा गर्ने क्रम जारी छ ।

भुकम्पमा परी १५३ जनाको मृत्यु भएको छ भने ३६४ जना घाइते भएका छन् । १७ हजार ८९६ घर पूर्ण रुपमा र १७ हजार ८५० घर आंशिक रुपमा क्षतिग्रस्त भएका छन् । सरकारले मृतकका परिवारलाई जनही २ लाख रूपैयाँ राहत र घाइतेहरूको निःशुल्क उपचार गर्ने घोषणा गरेको छ ।