भूकम्पको इपिसेन्टर रामीडाँडा मै पुगेन राहत, नेताको भने लर्को

२२ कात्तिक, जाजरकोट । भुकम्पले क्षति पुर्याएका क्षेत्रमा यति बेला अनुगमन गर्न आउने नेताहरूको लर्को छ । एकपछि अर्को पार्टीका नेता सोधपुछ गर्न पुगेका छन् । तर, भूकम्प गएको पाँच दिन बितिसक्यो, राहतको पत्तो छैन । खालि हात पुगेका नेताको भीडभाड देखेर पीडितहरु नै दिक्क मान्न थालिसके ।   

जाजरकोटको रामीडाँडा केन्द्रविन्दु बनाएर गएको ६.४ म्याग्निच्युडको भुकम्पले धेरै मानवीय र भौतिक क्षति गर्यो । जाजरकोट र रुकुममा अहिले उद्धार र राहतका लागि भन्दै सरकारी र गैरसरकारी क्षेत्रको सक्रियता बढेको छ । राष्ट्रपति, प्रधानमन्त्री, मन्त्रीहरूदेखि विभिन्न व्यक्तिहरूको ओहोरदोहोर चलिरहेको छ । तर भुकम्पको केन्द्रविन्दु भएको रामी डाँडामा भने अहिलेसम्म सरकारी कुनै राहत पुगेको छैन ।

गैरसरकारी क्षेत्रबाट केहीले पुर्याएको सामन्य राहत सामग्री बाहेक पाल समेत नआइपुगेको स्थानीयहरुले बताएका छन् । बारेकोट गाउँपालिकामा पर्ने रामी डाँडामा आएको राहत सामग्री गाउँपालिकामै थुप्रिएको स्थानीयले बताएका छन् । दलीय स्वार्थले गर्दा आएको राहत वितरणमा पनि ढिलाई भएको छ ।