कोशी प्रदेश सभामा आज पहिलो पटक मुख्यमन्त्रीसँग प्रश्नोत्तर

२३ कात्तिक, विराटनगर । कोशी प्रदेश सभामा पहिलो पटक मुख्यमन्त्रीसँग प्रश्नोत्तर कार्यक्रम हुने भएको छ । प्रदेश सभाका ८ जना सदस्यले मुख्यमन्त्री केदार कार्कीलाई प्रश्न सोध्ने भएका हुन् ।  

आज बिहीबार ११ बजे बिहान बस्ने कोशी प्रदेश सभाको बैठकमा प्रश्नोत्तर कार्यक्रम हुन लागेकाे बताइएकाे छ । कोशी प्रदेश सभाका सचिव गोपालप्रसाद पराजुलीका अनुसार प्रदेश सभा संचालन नियमावली २०७४ पहिलो शंसोधनको परिच्छेद ९ अनुसार प्रश्नोत्तर र ध्यानाकर्षण सम्बन्धी व्यवस्था अनुसार दफा ४० र ४१ बमोजिम सांसदहरुले मुख्यमन्त्रीलाई संसदमा प्रश्न गर्नेछन् । 

 मुख्यमन्त्रीसँग प्रश्न गर्नका लागि १० जना सांसदहरुले प्रश्न दर्ता गराइसकेको र उत्तरका लागि तयारी गर्न मुख्यमन्त्रीलाई प्रश्न टिपाइसकेको बताइएकाे छ । सचिव पराजुलीका अनुसार सांसदहरुले मुख्यमन्त्रीसँग एक पटक पूरक प्रश्न पनि गर्न पाउनेछन् । 

कोशी प्रदेश सभाको पहिलो कार्यकालमा नियमावलीमा व्यवस्था  भएपनि एक पटक पनि मुख्यमन्त्री र मन्त्रीसँग प्रश्नोत्तर कार्यक्रम भएको थिएन । तर मुख्यमन्त्री कार्कीले संसदलाई जनमुखी र जवाफदेही  बनाउन आफ्नो कार्यकालको सुरुवातमै भएपनि सांसदहरुसँग प्रश्नोत्तर कार्यक्रम राखेको बताएका छन् । 

कोशी प्रदेश सभा संचालन नियमावलीमा बैठकमा प्रश्नोत्तर र ध्यानाकर्षणसहित शून्य र विशेष समयमा बोल्न पाउने अनि नियमापत्ति गर्न पाउने व्यवस्था छ ।