मुद्दा हेर्ने न्यायाधीश नभएपछि रेशम चौधरीको रिट स्थगित

२३ कात्तिक, काठमाडौं । मुद्दा हेर्ने न्यायाधीश नभएपछि रेशम चौधरीको रिट आज स्थगितको सूचीमा परेको छ । सर्वोच्च अदालतमा यति बेला न्यायाधीशको चरम अभाव छ । रिट हेर्ने न्ययाधीश अपुग भएकाले चौधरीविरुद्धको रिट स्थगितको सूचीमा परेको हो । न्यायाधीश अभावका कारण चौधरीको बिहीबारको पेशीमा स्थगितमा परेको सर्वोच्च प्रशासनले जनाएको छ ।  
 
सर्वोच्चका अनुसार रिट निवेदनको समूह नै स्थगितमा परेपछि रेशमविरुद्धको मुद्दा पनि स्थगितमा परेको हो  । गोला तान्ने क्रममा रिट समूहको गोला कुनै पनि न्यायाधीशले तानेनन् । सरकारको सिफारिसमा गणतन्त्र दिवसको दिन चौधरीलाई बाँकी कैद मिनाहा गरिदिएपछि यो निर्णयविरुद्ध रिट परको थियो । सरकारको सोही निर्णयविरुद्ध टीकादुर घटनामा मृत्यु भएका सशस्त्र प्रहरी निरीक्षक केशव बोहोराकी श्रीमती शारदा कडायतले सर्वोच्चमा रिट दर्ता गराएकी थिइन् । 

 
जेठ १६ गते दर्ता गरिएको रिटमा जेठ २३ गते न्यायाधीश प्रकाशमान सिंह राउतको एकल इजलासले चौधरीको बाँकी कैद मिनाहा गर्नुको कारण माग गर्दै मुद्दालाई अग्राधिकार दिने आदेश भएको थियो । राष्ट्रपति कार्यालयबाट चौधरीको बाँकी कैद मिनाहा गर्नुको कारणसहितको जवाफ सर्वोच्च अदालतमा पेश गरेपछि कात्तिक २३ गतेका लागि पेशी तोकिएको थियो ।