धनतेरसमा चढाउन सुन र चाँदीका ४३ हजार थान सिक्का बिक्री भए, आजसम्म मात्र खरिद गर्न पाइने

२४ कात्तिक, काठमाडौं । धनतेरमा चढाउन प्रयोग गरिने सुनचाँदीका ४३ हजार थान सिक्का बिक्री भएका छन् । काठमाडौंको बबरमहलस्थित राष्ट्र बैंकको टक्सार विभागबाट धनतेरसलाई लक्षित गरी गत आइतबारदेखि सुन–चाँदीका सिक्का बिक्री सुरु गरेको थियो । बिहीबारसम्ममा यति सिक्का बिक्री भएका हुन् ।  यस्ता सिक्का आजसम्म मात्र बिक्री हुन्छन् । 

आइतबारदेखि बिहीबारसम्मको अवधिमा सुन र चाँदीका ४३ हजार थान सिक्का बिक्री भएको टक्सार विभागले जनाएको छ । राष्ट्र बैंकले सुनका १० ग्राम, ५ ग्राम र २.५ ग्रामका सिक्का (असर्फी) तथा चाँदीका १० ग्राम र २५ ग्रामका सिक्का (मेडालियन) बिक्री गर्दै आएको छ । सुनचाँदीको प्रचलित बजार मूल्यमा निर्माण लागत थप गरी राष्ट्र बैंकले सिक्का बिक्री गर्दै आएको छ ।

धनतेरसमा लक्ष्मीको पूजा गर्दा सुन–चाँदीका सिक्का राखेर पूजा गर्ने चलन छ । त्यसैले राष्ट्र बैंकले तिहारलाई लक्षित गर्दै सुन–चाँदीका सिक्का बिक्री गर्दै आएको छ । राष्ट्र बैंकका कर्मचारीहरुका अनुसार विगतका वर्षहरुमा भन्दा यस वर्ष सुन–चाँदीका सिक्काको माग बढी छ ।

विभागका कर्मचारीलाई सिक्का बेच्न भ्याइनभ्याइ छ । सुरक्षाकर्मी पनि लाइन व्यवस्थापनमै तल्लीन छन् । आज पनि  सुन र चाँदीका सिक्का किन्न सर्वसाधारण तँछाडमछाड गरिरहेका छन् । गत वर्षको तुलनामा यस वर्ष सिक्काको माग बढेको राष्ट्र बैंक टक्सार विभाग प्रमुख थानेश्वर आचार्यले बताए । 

आइतबारदेखि बिहीबारसम्म सुन र चाँदीका गरी करिब ४३ हजार थान सिक्का बिक्री भइसकेको आचार्यले जानकारी दिए । गएको पाँच दिनमा सुनका १० ग्राम र ५ ग्रामका असर्फी ७ हजार थान, २.५ ग्रामको ५ हजार थान बिक्री भइसकेको छ । सोही अवधिमा चाँदीका १० ग्रामका सिक्का २८ हजार र २५ ग्रामका ३ हजार थान बिक्री भएका छन् । तिहार र धनतेरसका लागि राष्ट्र बैंकले आज शुक्रबारसम्म सिक्का बिक्री गर्ने जनाएको छ ।

सुनको बजार मूल्यका आधारमा असर्फीको मूल्य तय हुन्छ । बजारमा सुनका गहना खरिद गरेजस्तै राष्ट्र बैंकबाट असर्फी खरिद गर्न सकिन्छ । बजारमा सुनचाँदी पसलमा पनि असर्फी बिक्रीका लागि राखिएको हुन्छ । तर राष्ट्र बैंक सरकारी निकाय भएकाले गुणस्तरमा विश्वस्त हुन सकिन्छ । सर्वसाधारणबाहेक संगठित तथा निजी क्षेत्रका संस्थागत खरिदकर्ताबाट प्रयोजन खुलाई न्यूनतम २० थान असर्फी माग भए असर्फीको मौज्दात, माग गर्ने संस्थाको आवश्यकता तथा औचित्यताका आधारमा विभागीय निर्णयबाट राष्ट्र बैंकले बिक्री गर्छ ।

सुनको बजार मूल्यमा निर्माण लागत थप गरी असर्फीको मूल्य तय गरिएको हुन्छ । व्यक्तिलाई असर्फी बिक्री गर्दा राष्ट्र बैंकले सुनको प्रचलित बजार मूल्यमा प्रतिग्राम ३ सय रुपैयाँ थप गरी दैनिक मूल्य तय गर्छ । तर संस्थाको हकमा प्रतिग्राम ५ सय रुपैयाँ थप हुने राष्ट्र बैंकले बताएको छ । बिहीबारको सुनको मूल्यअनुसार असर्फीको मूल्य साढे २ ग्रामको २५ हजार १ सय २० रुपैयाँ, ५ ग्रामको ५० हजार २ सय ४० रुपैयाँ र १० ग्रामको १ लाख ४ सय ८० रुपैयाँ तोकिएको छ ।