असोज महिनामा भित्रियो १ खर्ब ३६ अर्ब ९७ करोड रेमिट्यान्स

२४ कात्तिक, काठमाडौं । गएको असोज महिनामा रेमिट्यान्समा उल्लेख्य बृद्धि भएको छ । उक्त महिनामा १ खर्ब ३६ अर्ब ९७ करोड रेमिट्यान्स भित्रिएको छ । यो एक महिनाको अवधिमा भित्रिएको अहिलेसम्मकै उच्च रकम हो ।

चालू आर्थिक वर्षको भदौसम्म २ खर्ब २८ अर्ब रूपैयाँ रेमिट्यान्स भित्रिएकोमा असोजमा यो रकम बढेर ३ खर्ब ६५ अर्ब ३४ करोड रूपैयाँ पुगेको हो । असोज महिनामा मात्र १ खर्ब ३६ अर्ब ९७ करोड रूपैयाँ रेमिट्यान्स भित्रिएको नेपाल राष्ट्र बैंकले जनाएको छ ।

नेपाल राष्ट्र बैंकका अनुसार यस महिनासम्म भित्रिएको रेमिट्यान्स अघिल्लो आवको यसै अवधिको तुलनामा ३० प्रतिशत धेरै हो । अघिल्लो आवको असोजमा विप्रेषण आप्रवाह १६.८ प्रतिशतले मात्र बढेको थियो ।

अघिल्लो वर्षको सोही अवधिमा विप्रेषण आप्रवाह १६.८ प्रतिशतले बढेको थियो । तर, वैदेशिक रोजगारीका लागि संस्थागत तथा व्यक्तिगत नयाँ श्रम स्वीकृति र पुनः श्रम स्वीकृति लिनेको संख्या भने घटेको छ । 

असोज मसान्तसम्म नयाँ श्रम स्वीकृति लिने नेपालीको संख्या एक लाख १३ हजार ३९७ छ । गत गर्षको सोही अवधिमा नयाँ श्रम स्वीकृति लिनेको संख्या एक लाख ४७ हजार ९२३ थियो ।