मोरङको उर्लाबारीमा आगलागी हुँदा प्रहरीसहित २८ जना घाइते, चारको अवस्था गम्भीर

२७ कात्तिक, मोरङ । मोरङको उर्लाबारी ७ स्थित सुन पसलमा आगलागी हुँदा प्रहरीसहित २८ जना घाइते भएका छन् । आगोको लप्काले भेट्दा जलेर गम्भीर घाइते भएकाहरूको झापा र मोरङका विभिन्न अस्पतालमा उपचार भइरहेको छ । काठमाडौं लैजान पर्ने घाइतेका लागि अस्पतालसँग कोशी प्रदेश सरकारले समन्वय गरेको छ ।

इलाका प्रहरी कार्यालय उर्लाबारीका अनुसार लक्ष्मी पूजाको दिन राति इटहरा रोडका दीपक कार्कीको घरमा रहेको सुन पसलमा आगलागी भएको हो । आगो निभाउन खटिएका प्रहरी सहायक निरीक्षकसहित चार प्रहरी र थप २४ स्थानीय जलेर घाइते भएको इलाका प्रहरी कार्यालय उर्लाबारीका प्रमुख देवेन्द्र दासले जानकारी दिए । 

घटनामा उद्धारमा खटिएका प्रहरी सहायक निरीक्षक चूडामणि प्रधान, प्रहरी सहायक हवल्दार मनबहादुर घिसिङ, प्रहरी जवानहरू रितिकिरण राई र दिलकुमार आचार्य घाइते छन् । घाइतेमध्ये १२ जना बीएन्डसी अस्पताल बिर्तामोड,पाँच जना न्युरो आर्या विराटनगर,  सात जना विराट नर्सिङ होम विराटनगर, विराटनगरको रेडप्लस अस्पतालमा दुई जना, लाइफ लाइन अस्पताल दमकमा एक जना र गोदावरी अस्पताल उर्लाबारीमा एक जनाको उपचार भइरहेको प्रहरीले जनाएको छ ।