कफीको समर्थन मूल्य निर्धारण, प्रतिकेजी १०० पुग्यो

१ मंसिर, काठमाडौं । सरकारले आजदेखि लागु हने गरी कफीको न्यूनतम समर्थन मूल्य निर्धारण गरेको छ । राष्ट्रिय चिया तथा कफी विकास बोर्डले फ्रेस चेरी ए को प्रतिकेजी १ सय रुपैयाँ मूल्य निर्धारण गरेको हो । गत वर्षको मूल्यभन्दा प्रतिकेजी ५ रुपैयाँ बढाएर बोर्डले यो वर्षको मूल्य १ सय रुपैयाँ निर्धारण गरेको छ ।

गत वर्ष फ्रेस चेरी बी प्रतिकेजी ९० रुपैयाँ मूल्य निर्धारण गरिएको थियो । बोर्डले हरेक वर्षको मंसिर १ गते लागू हुने गरी कफीको मूल्य निर्धारण गर्दै आएको छ । बोर्डले यसलाई निरन्तरता दिदै बिहीबार यो वर्षका लागि कफीको मूल्य निर्धारण गरेको हो । बोर्डका अनुसार फ्रेश चेरी बीको प्रतिकिलो ९० रुपैयाँ निर्धारण गरिएको छ ।

गत वर्ष यसको ८५ रुपैयाँ थियो भने यो वर्ष प्रतिकिलो ५ रुपैयाँ बढाएर ८० रुपैयाँ पुर्याइएको हो । यस्तै पार्चमेन्ट प्रशोधित कफीतर्फ ‘ए ग्रेड’ को प्रतिकिलो पाँच सय रुपैयाँ निर्धारण गरेको छ । बी ग्रेडलाई ४५० रुपैयाँ नै कायम गरिएको छ । यस्तै ड्राइचेरी ‘ए ग्रेड’ प्रतिकिलो २०० रुपैयाँ कायम गरेको छ भने ड्राइचेरी बी १५० रुपैयाँ निर्धारण गरेको छ ।

८ सय मिटरभन्दा माथिको उचाईमा प्राङ्गारिक प्रणालीअनुसार उत्पादन गरिएको, ठिक्क पाकेको, पानीमा राख्दा डुब्ने र केलाएर छानिएको चेरीलाई ए ग्रेडको फ्रेस चेरी कफी भनिएको हो । यस्तै ग्रेड ए गुणस्तरको फ्रेस चेरीबाट उत्पादन भएको, पानीमा राख्दा डुब्ने, ११ प्रतिशत चिस्यान भएको कफीलाई पार्चमेन्ट ए ग्रेडको कफी भनिन्छ ।

त्यसैगरी ग्रेड ए फ्रेस चेरीबाट उत्पादन भएको ड्राई चेरीलाई ए ग्रेडको ड्राई चेरी ए ग्रेडको कफी भनिएको हो । नेपालमा उत्पादन हुने कफी विश्वको उत्कृष्ट कफीमध्ये एक मानिएको छ । कफी बोर्डका कार्यकारी निर्देशक विष्णुप्रसाद भट्टराईले आर्थिक वर्ष २०७९÷८० मा नेपालभर ३९४.४ टन ग्रीन वीन कफी उत्पादन भएको बताए । उनले कुल उत्पादनको झन्डै २० प्रतिशत कफी विदेश निर्यात भएको पनि जानकारी दिए ।

निर्देशक भट्टराईका अनुसार आर्थिक वर्ष २०७८÷७९ को तथ्यांक अनुसार १२ करोड ७६ लाख रुपैयाँ बराबरको ७९.८ टन कफी नेपालमा आयात हुँदा ११ करोड ७० लाख रूपैयाँ बराबरको ६९.५ टन मात्रै कफी निर्यात भएको थियो । आर्थिक वर्षमा २०७९÷८० को तथ्यांक अनुसार १३ करोड ४ लाख बराबरको ७७.८६ मे. टन कफी निर्यात हुँदा ३२ करोड ५८ लाख बराबरको ४५० टन कफी आयात भएको छ ।

नेपाली कफीले अन्तर्राष्ट्रिय बजारमा स्वाद र गुणस्तरको हिसाबले अन्य राष्ट्रको भन्दाढी मूल्य प्राप्त गर्दै आएको छ । नेपाली कफी निर्यात हुँदा सरदर प्रति केजी १६ अमेरिकी डलर प्राप्त हुने गर्छ । आयात मूल्यको तुलनामा झन्डै २÷३ गुणा बढी मूल्यमा नेपाली कफी निर्यात हुँदै आएको छ ।