मंसिर ४ गते अर्थतन्त्रबारे प्रधानमन्त्रीको सर्वपक्षीय छलफल

१ मंसिर, काठमाडौं । प्रधानमन्त्री पुष्पकमल दाहाल प्रचण्डले मंसिर ४ गते अर्थतन्त्रको सुधारका विषयमा सर्व पक्षीय छलफल डाकेका छन् । उनले मंसिर ४ गते आफूले अर्थतन्त्र सुधार्न वृहत् बैठक बोलाएको बताएका छन् । 

शुक्रबार बिहान तनहुँको आँबुखैरेनीमा आयोजित कार्यकर्ता भेटघाटमा प्रधानमन्त्री प्रचण्डले बिहान मात्रै सुरक्षा निकायका प्रमुखहरूसँग छलफल गरेको बताए । देशको सुरक्षा अवस्था सामान्य रहेको र मंसिर ४ गते अर्थतन्त्रका विषयमा गोलमेच हुने बताए । 

त्यो बैठकमा अर्थतन्त्रमा गति ल्याउने विषयमा गम्भीर छलफल हुनेछ । उक्त बैठकले ठोस प्याकेज घोषणा गर्नेछ र अर्थतन्त्रमा सुधार ल्याइनेछ, उनले भने । अहिलेको सरकारले देश र जनताका पक्षमा महत्वपूर्ण कामहरू गरेको उनले बताए । 

उनले भ्रष्टाचारका फाइल खोल्ने क्रम नरोकिने समेत बताए । भ्रष्टाचार नियन्त्रण, सुशासन स्थापित, जनतालाई सेवा दिने कुरामा हामी इमानदार भएर लागेका छौं, प्रधानमन्त्री प्रचण्डले भने, भ्रष्टाचारका फाइलहरू खोलिँदैछ, यो प्रक्रिया रोकिन्न ।