एघार महिनासम्म प्रधानमन्त्री भइरहन पाएकोमा दाहाल दंग

१ मंसिर, काठमाडौं । प्रधानमन्त्री पुष्पकमल दाहाल 'प्रचण्ड'ले आज तनहुँ र पोखरामा गरी दुई ठाउँको सम्बोधनमा आफू प्रधानमन्त्री भएको मात्र नभएर ११ महिनासम्म टिक्न सकेको प्रसंग कोट्याए । उनले साथीहरूले एक महिना पनि प्रधानमन्त्रीमा टिकिराख्न नसक्ने भनेको कुरा सुनाउँदै उनले ११ महिनासम्म टिकेकोमा गर्व गरे । 
 
प्रधानमन्त्री प्रचण्डले एक महिनाभन्दा बढी प्रधानमन्त्री हुन नसक्ने साथीहरूले बताए पनि आफू १० महिनादेखि प्रधानमन्त्री भइरहेको बताए । सबैभन्दा थौरै समय प्रधानमन्त्री अटल बिहारी बाजपेयी १३ दिन भएको उनले सुनाए । बाजपेयीले १३ दिनमै सरकार छोड्नु परेको रहेछ, म त ११ महिना टिके । 

अझै प्रधानमन्त्री भएर भ्रष्टाचार र बेइमानहरूलाई ठीक गर्ने विचार छ, उनले भने, सुशासन, सामाजिक न्याय र समृद्धिलाई अझै राम्रो गर्ने, गर्न खोज्दा खोज्दै कोही आएछन् भने जनता त छँदैछन् । आँबुखैरेनीमा शुक्र चुमानले गरेजस्तै केन्द्रमा हामीले त्यसै गरियो भने जनताले साथ दिने पक्का छ ।

शुक्रबार तनहुँको आँबुखैरेनी अस्पताल उद्‍घाटन गर्दै प्रधानमन्त्री दाहालले भने, ‘कोही १५ दिन, कोही २० दिन प्रधानमन्त्री बनेका रहेछन् । साथीहरू भन्थे– एक महिनाभन्दा बढी तेरो जाँदैन । ठिकै छ, एक महिना राम्रो काम गर्ने कोसिस गर्छु, गर्दा गर्दै छाड्नु परेछ भने जनतामा जान्छु भनेको थिएँ । भन्दै जाँदा अहिले १० महिना, अब ११ महिना हुन लागिसक्यो, बाँचि राखिएको छ, प्रधानमन्त्री भइ राखिएको छ ।’

उनले अझै राम्रो काम गर्न आफूले खोजिरहेको बताए । प्रदेश र स्थानीय तहलाई अधिकारसहित बलियो बनाउने इच्छा उनको थियो । संविधानले परिकल्पना गरेका सबै अधिकार तल्लो सरकारसम्म पुर्याउने काम अझै बाँकी रहेको उनले बताए । संविधानले परिकल्पना गरेको सबै अधिकार तल्लो तहसम्म पुर्याउँछौँ, अधिकार नपुग्दै गर्दा संघीयता असफल भयो भन्न नहुने उनको तर्क थियो । 

प्रदेश सरकार बलियो बनाउन प्रहरी समायोजन ऐन, निजामती ऐन र शिक्षा ऐन आवश्यक भएको बताउँदै प्रधानमन्त्री भने, यी ऐन भए मात्रै प्रदेश सरकार बलियो हुन्छ, नत्र बलियो हुँदैन । प्रदेश सरकार भएको अनुभूति जनतालाई दिलाउन सकिएन भने प्रदेशको महत्वबारे बुझाउन सकिँदैन ।