छठको तयारी सुरु : हेर्नुस तस्विरमा सिंगारिन थाले जलाशय

१ मंसिर, काठमाडौं । तिहार सकिएसँगै छट पर्वको तयारी सुरु भएको छ । विशेष गरी तराई मधेसमा मनाईने छट पछिल्ला वर्षमा काठमाडौं उपत्यकालगायत पहाडी भेगमा समेत मनाउन थालिएको छ ।  जनकपुरको प्रसिद्ध गंगासागर लगायत, विभिन्न जलाशय तथा काठमाडौंको पशुपति क्षेत्र स्थित गौरी घाटलगायतका क्षेत्रमा छठ पर्वको तयारी सुरु भएको हो ।

गौरीघाटमा छठ पूजा समितिले बाँस गाड्ने, घाट सजावटलगायत काम सुरु गरेको हो । छठ पूजाको सबै तयारी अन्तिम चरणमा पुगेको भन्दै बत्ति, टेन्ट सबैको काम भइरहेको गौरीघाट छठ पूजा व्यवस्थापन समिति अध्यक्ष अनिल कुमार सिंहले जानकारी दिएका छन् ।

उनले भने, ‘सबै तयारी अन्तिम चरणमा छ, यहाँ मुख्य कुरा भनेको सरसफाइ हो हामीले खोलाहरू सफा गरेका छौ । यसको साथै बत्ति, टेन्ट सबैको काम भइरहेको छ । २ दशकभन्दा बढि समय भयो यहाँ छठ मनाउँन थालिएको, यहाँ घाटमा धेरै नै फोहोर छ, पशुपति विकास कोषले हेर्छ तर जति हुनुपर्ने त्यही भएको छैन् । यहाँ ४ देखि ५ लाख मानिस आउँने गर्छन्, व्रतालु ५ सयभन्दा बढि हुदैँन् ।’ गौरीघाट, कमलपोखरी, विष्णुमती, नख्खु, गहनापोखरी, कुपण्डोललगायत काठमाडौंका २१ स्थानमा पूजा स्थलको निर्माण सुरु गरिएको छ । 

गौरीघाटस्थित बागमती नदीमा सफाइ गर्ने, नदी किनाराका झार तथा फोहर हटाउने, टेन्ट तथा त्रिपाल, बत्ती एवं छठी माताको मूर्ति राख्ने काम जारी छ । पछिल्लो समय पहाड एवं हिमाल वासीले पनि सूर्य आराधनाको पर्व छठ मनाउन थालेका छन् । तराईमा धुमधामसँग मनाइने सूर्य आराधनाको पर्व छठ एक दशक अघि देखि काठमाडौंमा पनि भव्य रुपमा मनाउन थालिएको छ । 

यस वर्ष मंसिर ३ गते आइतबार छठ पर्वअन्तर्गत अस्ताउँदो सूर्यलाई अर्घ्य दिइन्छ । त्यस दिन राष्ट्रपति विद्यादेवी भण्डारीले गौरीघाटमा अस्ताउँदो सूर्यलाई अघ्र्य दिएर पूजा गर्ने जनाइएको छ । यस्तै, मंसिर ४ गते सोमबार बिहान उदाउँदो सूर्यलाई अघ्र्य दिएपछि छठ पर्व समापन हुन्छ ।