आयल निगममा सीईओ थानीको मनपरी, मौज्दातमा तेल राखेर बजारमा अभाव सिर्जना

२ मंसिर, काठमाडौं । नेपाल आयल निगमका कार्यकारी निर्देश उमेशप्रसाद थानीको व्यवस्थापकीय कमजोरीका कारण तिहार यता देशका विभिन्न भागमा पेट्रोलियम पदार्थको अभाव भएको छ । यो अभाव निगममा पेट्रोल र डिजेल नभएर भएको नभइ निगमले पेट्रोल पम्पहरुलाई तेल नदिएर भएको हो । 

कर्मचारीको अभाव र चाड लागेको भन्दै निगमले तेल दिन रोकपछि पोखरा, सुनसरी, भैरहवा लगायतका पेट्रोल पम्पहरुले तेल दिन छाडेका छन् । अहिले पनि यी क्षेत्रमा निगमले तेल नदिएको भन्दै पम्पहरुले पर्याप्त तेल दिएका छैनन् । कतिपयले त पम्प नै बन्द गरेका छन् । देशका विभिन्न शहरबाट निगममा तेल नभरिएको गुनासो आउँदा पनि कार्यकारी निर्देशन थानीले वास्ता गरेका छैनन् । 

निगमका भण्डारणमा भने पर्याप्त पेट्रोल र डिजेल रहेको छ । तिहार सकिए पनि छठको कारण देखाएर निगमका अधिकांश डिपोले पम्पलाई तेल नदिएको बताएका छन् । यता, आयल निगमले भने पम्पहरुलाई पर्याप्त तेल वितरण गरिरहेको जनाएको छ । दशैंपछि तिहार बिदाका लागि भनेर निर्देशक थानीले निगमका महत्वपूर्ण विभागका निर्देशकहरूलाई विदेश घुम्न पठाएका छन् । 

यसरी तेलको हाहाकार हुँदा नेपाल आयल निगमका उच्च अधिकारी भने विदेश घुमघाममा व्यस्त छन् । अधिकांश विभागीय प्रमुखहरु इण्डोनेशियाको राजधानी बाली पुगेका छन् । निगम कर्मचारीका अनुसार निगमको योजना प्रशासन तथा मानव संसाधन विकास विभाग निर्देशक निर्मला आचार्य, योजना प्रशासन तथा मानव संशाधन विकास विभाग प्रबन्धक दीपकप्रसाद घिमिरे, योजना प्रशासन तथा मानव संशाधन विकास विभाग कार्यरत तथा नेपाल आयल निगम स्वतन्त्र कर्मचारी यूनियन ट्रेड युनियन अध्यक्ष तथा उप प्रबन्धक विकास बखती बालीमा छन् ।

यस्तै आपूर्ति तथा वितरण विभाग (एलपीजी ग्याँस तथा एभिएशन विभाग) निर्देशक दीपक बराल, गुणस्तर नियन्त्रण तथा अनुगमन विभाग (आन्तरिक नियन्त्रण तथा अनुगमन विभाग) मा कार्यरत निर्देशक बिनी श्रेष्ठ र नेपाल आयल निगम राष्ट्रिय कर्मचारी संघ अध्यक्ष मधुमास पुन बाली घुमघाममा छन् । उनीहरूलाई बाली घुमघामको प्रबन्ध निगमका कार्यकारी निर्देशक उमेश थानीले गरेका हुन् । उनीहरू गत नोभेम्बर १५ मा बालिका लागि प्रस्थान गरेका हुन् ।

विभागीय प्रमुख नहुँदा यसको व्यवस्थापन कसरी गर्ने भन्ने अन्योल डिपोहरूमा छ । कार्यकारी निर्देशक थानीको मनोमानीले पटक पटक उपभोक्ताहरू समेत मारमा परेका छन् । यसअघि डिजेल र पेट्रोलको मूल्य घटाउँदा पनि पम्पहरुले विना जानकारी मूल्य घटाएको भन्दै तेल बिक्री बन्द गरेका थिए । थानीले पेट्रोलियम पदार्थको मूल्य घटेर आउँदा समायोजनमा आनाकानी गर्दै आएका थिए । भारतीय आयल निगमलाई तिर्ने बक्यौता धेरै रहेको बहाना बनाउँदै उनले लामो समय मूल्य घटेर आउँदा पनि समायोजन गर्न आनाकानी गर्दै आएका थिए ।       

निगमले तेल नदिएपछि तिहारमा पोखराका अधिकांश पेट्रोल पम्पले सूचना टाँसेर वितरण रोकेका थिए । उनीहरूले अझै पनि तेल दिएका छैनन् । अझै पनि पोखराका अधिकांश पेट्रोल पम्पमा सूचना टाँस गरेर दिउँसो ४ बजेमात्र पेट्रोलियम पदार्थ वितरण गर्न सक्ने भनेका छन् । तिहार बिदामा इन्धन नै नआएको र भण्डारण पनि सकिएकाले पेट्रोल, डिजेल दिन नसकेको पेट्रोल पम्पहरुले जनाएका छन् । यसको जिम्मेवारी निगमले अझैसम्म लिएको छैन । 

शुक्रबार साँझदेखि शनिबारसम्म पेट्रोलियम पदार्थ नियमित हुने र आइतबार छठको बिदा भएकाले सोमबार फेरि अभाव हुन सक्ने पेट्रोल पम्पहरुले जनाएका छन् । लेखनाथ क्षेत्रका केही पेट्रोल पम्पहरुबाट वितरण भए पनि अधिकांश अहिले पनि बन्द नै छन् ।