आर्थिक गोलमेचमा राखिने विषय बस्तुमाथि छलफल गर्न प्रधानमन्त्रीले बोलाए सरकारी पक्षको बैठक

४ मंसिर, काठमाडौं । प्रधानमन्त्री पुष्पकमल दाहाल प्रचण्डले अर्थतन्त्र सुधारका उपाय खोजी गर्न गर्न लागेको गोलमेच बैठकका तयारीका लागि आज सरोकारवाला सरकारी प्रतिनिधिसँग छलफल गर्न बैठक बोलाएका छन् । 

अपरान्ह ४ बजे बालुवाटारमा बोलाइएको बैठकमा अर्थ मन्त्रालय, राष्ट्रिय योजना आयोग, राष्ट्र बैंकलगायत सरकारी निकायका प्रतिनिधिहरू उपस्थित हुनेछन् । प्रधानमन्त्रीको सरकारी निवास बालुवाटारमा हुने छलफल अर्थतन्त्रको वर्तमान अवस्था, निजी क्षेत्रका सुझाव र सुधारका लागि सरकारले गर्नुपर्ने निर्णयका विषयमा केन्द्रित हुने प्रधानमन्त्री प्रचण्डको सचिवालयले जनाएको छ ।

१ मंसिरमा तनहुँमा आयोजित एक कार्यक्रमलाई सम्बोधन गर्दै प्रधानमन्त्री प्रचण्डले भनेका थिए, ‘मंसिर ४ गते मैले अर्थतन्त्र सुधार्न वृहत् बैठक बोलाएको छु । त्यो बैठकमा अर्थतन्त्रमा गति ल्याउने विषयमा गम्भीर छलफल हुनेछ । उक्त बैठकले ठोस प्याकेज घोषणा गर्नेछ र अर्थतन्त्रमा सुधार ल्याइनेछ ।

प्रधानमन्त्री प्रचण्डले आफूले सरकारको नेतृत्व गर्ने बेला देशको अर्थतन्त्र चुनौतिपूर्ण रहे पनि अहिले राम्रो सुधार आएको तर दबाबमुक्त भने नभइसकेको पनि बताएका थिए । प्रधानमन्त्रीले बोलाउने आर्थिक क्षेत्रको गोलमेच बैठकमा प्रस्तुत गर्न निजी क्षेत्रको छाता संगठन नेपाल उद्योग बाणिज्य महासंघले पनि व्यवसायीहरू सँग सुझाव मागेको छ । गोलमेच बैठकको मिति भने तय भएको छैन ।