काजमा रहेका प्रहरीलाई २४ घण्टाभित्र रवाना हुन निर्देशन

४ मंसिर, काठमाडौं । प्रहरी प्रधान कार्यालयले वर्षौदेखि काजमा बसेका कर्मचारीलाई डण्डा लगाउने भएको छ । २४ घण्टे पूर्जी काटेर तुरुन्तै तोकिएको स्थानमा जान निर्देशन दिएको छ । प्रहरीले तोकिएको स्थानमा पदस्थापन वा सरुवा भएका कर्मचारी प्रहरी प्रधान कार्यालय र अनुकुल स्थानमा शक्ति केन्द्रको आडमा बस्दै आएकाहरुलाई तुरुन्तै रवाना नलिए कारबाही गर्ने चेतावनी दिएको छ ।

प्रहरी प्रधानकार्यालयले सोमबारबाट लागु हुनेगरी रवाना लिन निर्देशन दिएको हो । ‘तत्काल तोकिएको स्थानमा नगए कारबाही हुने जानकारी दिदै सबैलाई पत्रचार गरिएको छ’, प्रहरी प्रधानकार्यालय स्रोतले भन्यो ।  नेपाल प्रहरी प्रधान कार्यालय प्रशासन शाखाले सबै विभाग, ब्यूरो, निर्देशनालय, महाशाखा, शाखाहरू, सबै प्रदेश प्रहरी कार्यालय र सबै जिल्ला प्रहरी कार्यालयलाई पत्र लेखेर २४ घण्टाभित्र सम्बन्धित दरबन्दीमा रवाना हुन निर्देशन दिएको हो ।

रवाना गरेको नपाइएमा सम्बन्धित कार्यालय प्रमुखलाई विभागीय आदेश निर्देशनको विपरीत कार्य गरेको आधार मानी प्रहरी नियमावली बमोजिम कारबाही हुने व्यहोरा निर्देशअनुसार अनुरोधसमेत गरिएको भन्दै तत्कालै रवाना लिन निर्देशन दिएको छ । प्रहरी प्रधानकार्यालय मात्रै करिब ३ सय प्रहरी सोर्स र शक्तिकेन्द्रको आडमा काजमा बसेका छन् ।

त्यस्तै घुुमुवा र अन्य नाममा पनि काजमा बस्दै आएका छन् । विभिन्न जिल्ला प्रहरी कार्यालयमा पनि इन्जार्जले आफ्नो अनुकुलतामा काजमा राख्ने गरेका छन् । उनीहरूले काजमा राखेका प्रहरीको दुरुपयोग गर्दै अनुकुल आर्थिक लाभ लिने गरेको पनि प्रहरी प्रधानकार्यालयको बुझाई रहेको छ ।