अर्थतन्त्र चलायमान बनाउने विषयमा प्रधानमन्त्री प्रचण्डको आज निजी क्षेत्रसँग छलफल

५ मंसिर, काठमाडौं । सोमबार सरकारी पक्षका अधिकारीहरूसँग छलफल गरेका प्रधानमन्त्री पुष्पकमल दाहाल 'प्रचण्ड'ले अर्थतन्त्रलाई चलायमान बनाउने विषयमा आज निजी क्षेत्रका प्रतिनिधिसँग छलफल गर्दैछन् । लामो समयदेखि शिथिल रहेको अर्थतन्त्रलाई चलायमान बनाउन सरकारी पक्षले सवै सम्बन्धित निकायका प्रतिनिधिसँग छलफल थालेको हो । 

यतिबेला मुलुकका बाह्य सूचक बलिया हुँदै आएका छन् । वित्तीय प्रणालीमा पर्याप्त तरलता जम्मा भएको छ । बैंकको ब्याजदर घट्दो क्रममा रहेको लगायत सकारात्मक पक्ष भएपनि आन्तरिक आर्थिक गतिविधि बढ्न नसकेकाले अर्थतन्त्रलाई चलायमान बनाउन सरकारले छलफल थालेका हुन् । यसै क्रममा सरकारले आज दिउँसो दुई बजे सिंहदरबारमा निजी क्षेत्रसँग छलफलको कार्यक्रम राखेको छ । 

अर्थमन्त्री डा. प्रकाशशरण महतका अनुसार समग्र अर्थतन्त्रलाई थप चलायमान बनाउन सुझाव, सल्लाहसहित थप के गर्न सकिन्छ भन्ने विषयमा सरकारले निजी क्षेत्रसँग छलफल गर्न लागेको हो । देशको वर्तमान अर्थतन्त्रबारे छलफल गर्न सोमबार प्रधानमन्त्री निवास बालुवाटारमा बसेको बैठकले आज निजी क्षेत्रका प्रतिनिधिसँग छलफल गर्ने निर्णय गरेको हो । 

सोमबारको बैठकमा राष्ट्र बैंक, अर्थ मन्त्रालय, योजना आयोगलगायत विभिन्न मन्त्रालयका प्रतिनिधिको उपस्थिति थियो । छलफलमा प्रधानमन्त्रीको निर्देशनअनुसार अर्थमन्त्री महतले वर्तमान देशको अर्थतन्त्रबारे ब्रिफिङ गरेका थिए । त्यसपछि राष्ट्र बैंकका गभर्नर र राष्ट्रिय योजना आयोगका प्रतिनिधिले पनि आआफ्नो क्षेत्रको ब्रिफिङ गरेका थिए ।