आगलागीबाट विभिन्न धनमाल जलेर नष्ट

६ मंसिर,  काठमाडौं । देशका विभिन्न जिल्लामा आगलागी भएको छ । प्रहरीका अनुसार आगलागीबाट खुद्रा सामानहरुसहित धनमाल जलेर नष्ट भएको छ । 

प्रहरीका अनुसार बाराको महागढीमाई नगरपालिका-५ नगरदाहा टोल बस्ने भुलवान पाशवानको गोठ र सिरावान पाशवानको गोठमा मंगलबार दिउँसो आगलागी हुँदा उक्त आगो फैलिएर सोही ठाउँ बस्ने उमेश सराफ सुनारको घरसमेत ५ जनाको घरमा आगलागी हुँदा करिब २ लाख रूपैयाँ बराबरको धनमाल जलेर नष्ट भएको छ । 
 
यस्तै पर्साको पकहा मौनपुर गाउँपालिका-१ धोरेस्थित जगरनाथ साह सोनारको क्यान्टिनमा मंगलबार साँझ आगलागी हुँदा खुद्रा सामानहरु पूर्णरूपमा जलेर करिब १ लाख रूपैयाँ बराबरको धनमाल नष्ट भएको छ ।

उता बाँकेको नेपालगन्ज उपमहानगरपालिका-१८ कारकाँदो गाउँस्थित सडकमा पार्किङ गरी राखेको सोही उपमहानगरपालिका-१८ बस्ने चित्र बहादुर हमालको ना।१ क ४२११ नम्बरको जेसिबीमा मंगलबार राति आगलागी हुँदा जेसीबीको सम्पूर्ण प्लास्टिकको भाग जलेर नष्ट भएको छ ।

आगलागीबाट भएको क्षतिको विवरण हाल खुलेको छैन । प्रहरीले स्थानीय बासिन्दा र दमकलको सहयोगमा आगलागी नियन्त्रणमा लिनुको साथै यस सम्बन्धमा आवश्यक अनुसन्धान गरिरहेको छ ।