गणतन्त्रमा राजाको हैन, जनताको कुरा हुन्छः ओली

९ मंसिर, काठमाडौं । नेकपा एमालेका अध्यक्ष केपी शर्मा ओलीले लोकतान्त्रिक गणतन्त्र चिट्ठा परेर नभई लडेर ल्याएको बताएका छन् । उनले कुनै व्यक्ति र परिवार मुलुकका जनताभन्दा माथि व्यवस्था कल्पना गर्न नसकिने बताएका छन् । अहिले राजाका नाममा नेपालमा अस्थिरता ल्याउने षड्यन्त्र भइरहेको उनको भनाइ छ । 

नेपाल संवत ११४४ को अवसरमा एमाले काठमाडौंले शनिबार आयोजना गरेको कार्यक्रममा प्रमुख प्रतिपक्षी दलका नेता ओलीले सचेत जनताले पश्चगमनमा नजाने बताए । हामी ढुंगे युगतिर फर्किन सकिँदैन । जन्मिँदै कोही राजा हुने, जनताभन्दा ठूलो व्यक्ति र परिवार हुने कुरा सचेत जनताले स्वीकार्न सक्दैन, नयाँ पिँढीले स्वीकार्न सक्दैन,’उनले भने । 

लोकतान्त्रिक गणतन्त्र चिट्ठा परेर ल्याएको होइन, लडेर ल्याएको हो । त्यसको रक्षाका लागि एमाले उभिन तयार छ। एनले भने । जनताले लडेर ल्याएको राजनीतिक परिवर्तनका उपलब्धि रक्षा गर्नुपर्ने उनको भनाइ थियो । उनले नागरिकले नै सचेत भएर त्यसको रक्षाका लागि अगाडि बढ्नुपर्ने बताए । नेपालका विरुद्ध षड्यन्त्र भइरहेको पनि ओलीको भनाइ थियो ।

उनले जनतालाई विभिन्न बहानामा भड्काउन खोजिएको भन्दै सचेत हुन आग्रह गरेका छन् । कसले त्यसो गरिरहेको भन्ने स्पष्ट नभने पनि ओलीले जनता सचेत हुनुपर्ने आग्रह गरेका हुन् । हाम्रो देशका विरुद्ध षड्यन्त्र भइरहेको छ । हाम्रो देशलाई अस्थिरतामा फसाउने षड्यन्त्र भइरहेको छ । हाम्रा जनतालाई पहिचान, जात, धर्मका नाउँमा विभाजित गर्ने प्रयास भइरहेको छ । 

देशमा द्वन्द्व मच्चाउने प्रयास भइरहेको छ,’ उनले थपे, ’केही समय अगाडि हिन्दु र मुस्लिमका बीचमा झगडा लगाउने कोसिस भयो । त्यो षड्यन्त्र पर्दाफास भयो । त्यो असफल भएपछि जनतालाई असामयिक, असान्दर्भिक कुरा निकालेर, जनतालाई अल्मल्याएर त्यस प्रकारका काम भइरहेका छन् ।’