सम्पर्कविहीन २६ जना प्रहरीलाई सात दिनभित्र हाजिर हुन निर्देशन

११ मंसिर, काठमाडौं । लामो समयसम्म नेपाल प्रहरीमा विभिन्न पदमा कार्यरत २६ जना सम्पर्क विहीन भएका छन् । प्रहरी प्रधान कार्यालयले खोजतलास हुँदा पनि जानकारीबिनै दुई तीन महिनादेखि सम्पर्क विहीन भएको जनाएको छ । 

 प्रहरी महनिरीक्षकको सचिवालयले सूचना जारी गर्दै २ हवलदार, ४ प्रहरी सहायक हवलदार र २० प्रहरी जवान एक महिनाभन्दा  बढी समयदेखि आफूखुसी गैरहाजिर रहेको जानकारी दिएको छ।

उनीहरूको खोजतलास गर्दा पनि सम्पर्कमा नआएकाले प्रहरी प्रधान कार्यालयले सात दिन भित्र स्पष्टिकरणसहित सम्पर्कमा आउन निर्देशन दिँदै सूचना जारी गरेको हो।

प्रहरी प्रधान कार्यालयले उनीहरूलाई सात दिनभित्र पनि सम्पर्कमा नआए प्रहरी नियमावलीका अनुसार  सेवाबाट हटाइने चेतावनी दिएको छ।