व्यवस्था परिवर्तनका लागि भएका आन्दोलनले अन्तिम विकल्पका रुपमा गणतन्त्र स्वीकारेको हो: देउवा

११ मंसिर, चितवन । नेपाली कांग्रेसका सभापति शेरबहादुर देउवाले नेपालमा गणतन्त्रको विकल्पमा अर्को व्यवस्था सम्भव नभएको बताएका छन् । उनले अहिलेसम्म व्यवस्था परिवर्तनका लागि भएका आन्दोलनले अन्तिम विकल्पका रुपमा गणतन्त्र स्वीकार गरेको बताएका छन् । 

भरतपुर विमानस्थलमा पत्रकारहरूसँग कुरा गर्दै सभापति देउवाले गणतन्त्रको विरोधमा लागेर बेकारमा जीवनलाई बर्बाद बनाउने तिर नलाग्न आग्रह गरेका छन् । उनले भने, अहिलेको अवस्थामा आएर गणतन्त्रको विरोध गर्नुको अर्थ छैन, यो व्यवस्था बदलिने कुरा छैन, बदल्न आवश्यक पनि छैन् ।

उनले गणतन्त्रको बिरोध गर्नेहरूको अर्थ नरहेको र गणतन्त्र बिरोधी गतिविधिबाट राजनीतिक दलहरू अत्तालिनु आवश्यक नभएको बताए । यस्ता अनावश्यक कुरामा कांग्रेसले समय खेर नफल्ने र बेतुकका विषयमा टीकाटिप्पणी गर्न पनि आवश्यक नरहेको बताए । 

वर्तमान सत्तारुढ गठबन्धन दलको सत्तासाझेदारीका विषयमा पनि सभापति देउवालाई पत्रकारहरूले प्रश्न गरेका थिए । सरकारका नेतृत्वका विषयमा भएको आलोपालोको सहमतिबारे उनले स्पष्ट जवाफ दिएनन् । गठबन्धन दलको सत्ता साझेदारी कसरी हुन्छ ? यस प्रश्नमा उनको जवाफ थियो, थाहा पाइहाल्नु हुन्छ नी ।  

सो अवसरमा कांग्रेस नेता डा शशांक कोइरालाले राजतन्त्र फर्कने विषयमा आफूलाई विश्वास नलागेको प्रतिक्रिया दिए । उनले भने, राजतन्त्र फर्कनेमा मलाई कमै विश्वास छ । यहाँ हरेक कुराको सम्भावना छ । संसदले चाह्यो भने जे पनि हुनसक्छ । सरकारका कामप्रति नागरिक पूर्ण रुपमा सन्तुष्ट हुन नसक्दा व्यवस्थामाथि नै प्रश्न उठेको उनको भनाइ थियो ।

गणतन्त्र बचाउन सबै दल एक ठाउँमा उभिनु पर्नेमा जोड दिँदै उनले भने, मलाई पनि सरकारको काम त्यति सन्तोषजनक लागेको छैन । मुलुकको उन्नति र प्रगतितर्फ सरकारले ध्यान दिएन । संघीयता आवश्यक भए पनि यसको वर्तमान संरचनाप्रति भने प्रश्न उठेको हो । जनताका मनमा आएका व्यवस्था परिवर्तनसम्बन्धी आशङ्का हटाउन सबै दल एक ठाउँमा आउनुपर्छ ।