उपरथी थापाको शैक्षिक प्रमाणपत्र नक्कली भएको आरोप

१२ मंसिर, काठमाडौं । बढुवाको सम्मुखमा नेपाली सेनाका उच्च अधिकारीहरूमाथि नक्कली  शैक्षिक प्रमाणपत्र र दोहोरो नागरिकता भएको उजुरी पर्न थालेको छ । उपरथी निर्मल कुमार थापाको शैक्षिक योग्यताको प्रमाणपत्र नै नक्कली भएको उजुरी अख्तियार दुरुपयोग अनुसन्धान आयोगमा परेको छ ।

रथीमा बढुवाको क्रममा रहेका र हाल फोर्स कमाण्डरको रुपमा सिरियामा कार्यरत उपरथी निर्मल कुमार थापाविरुद्ध मंसिर ११ गते शैक्षिक प्रमाणपत्र नक्कली भएको आरोपमा छानबिन गर्न माग गर्दै अख्तियार दुरुपयोग अनुसन्धान आयोगमा उजुरी परेको हो । यसअघि रथीमा बढुवाका लागि सिफारिस भएका उपरथी ताराध्वज पाण्डेको जन्ममितिमा कैफियत देखिएपछि राजीनामा दिन बाध्य भएका थिए । साथै अर्का उपरथी अशोक सिग्देल विरुद्ध अख्तियार र रक्षा मन्त्रालयमा बेग्ला बेग्लै उजुरी परेको छ ।

थापाविरुद्ध अख्तियारमा पूर्व सैनिक अधिकृतहरूले प्रवीणता प्रमाण पत्र तह (आईए) को शैक्षिक प्रमाणपत्र नक्कली भएको भन्दै छानबिनका लागि अख्तियारमा निवेदन दिइएको छ । उनले भारतको गोरखपुर हाइस्कुलबाट ल्याइएको नक्कली प्रमाणपत्र ल्याएर २०४३ सालमा नेपाली सेनामा भर्ना भइ हाल उपरथी भई सिरियामा कार्यरत रहेको सो उजुरीमा उल्लेख छ ।

भावी प्रधानसेनापतिकै रुपमा बढुवा सिफारिस भएका र वरियताको शीर्षस्थानमा रहेका उपरथी पाण्डेको राजीनामा स्वीकृति भएसँगै दोस्रो वरियतामा रहेका उपरथी अशोककुमार सिग्देल रथीका लागि बढुवा सिफारिस भइसकेका छन् । उनीविरुद्ध एक साताभित्र उजुरी दिन सकिने सैनिक मुख्यालयले जनाएको बेला उपरथी थापाको शैक्षिक प्रमाणपत्र छानबिन गर्न माग गरिएको हो । सैनिक मुख्यालयले सीताराम खड्काको संयोजकत्वमा सिग्देलको दोहोरो नागरिकता र जन्ममिति बारे छानबिन गरिरहेको बताइएको छ ।