प्रधानमन्त्री प्रचण्ड भेट्न एमाले अध्यक्ष ओली सिंहदरबारमा

१२ मंसिर, काठमाडौं । प्रमुख प्रतिपक्षी नेकपा एमालेका अध्यक्ष केपी शर्मा ओली प्रधानमन्त्री पुष्पकमल दाहाल प्रचण्ड भेट्न सिंहदरबार पुगेका छन् । दुई जनाबीच अहिले भेटघाट भइरहेको छ । ओली केहीबेर अगाडि सिंहदरबार छिरेका हुन् ।  

ओली–प्रचण्ड भेटमा संक्रमणकालीन न्यायको अन्त्यका लागि टीआरसी विधेयकको टुंगो, गणतन्त्रविरोधी पछिल्ला आन्दोलन र गतिविधिलगायत समसामयिक घटनाक्रममा छलफल भइरहेको हुन सक्ने बताइएको छ । 

पछिल्लो समय संविधान र शान्ति प्रक्रियाबाट प्राप्त उपलब्धि विरुद्ध संगठित रूपमा जनतामा उत्तेजना फैलाउने र यसका नेतृत्व कर्तामाथि लाञ्छना लगाउने क्रम बढेको भन्दै प्रमुख राजनीति दलहरू संघीय लोकतान्त्रिक गणतन्त्र रक्षार्थ आफूहरू एकजुट रहेको बताउँदै आएका छन् ।