प्रहरी समायोजन यथाशीघ्र गरिने प्रदेशका गृहमन्त्रीहरुलाई प्रधानमन्त्री र गृहमन्त्रीको आश्वासन

१२ मंसिर, काठमाडौं । प्रधानमन्त्री पुष्पकमल दाहाल प्रचण्ड र गृहमन्त्री नारायणकाजी श्रेष्ठले प्रदेशका गृहमन्त्रीहरुलाई प्रदेश प्रहरी समायोजनको काम चाँडै सम्पन्न हुने आश्वासन दिएका छन् । प्रहरी समायोजनको प्रक्रिया यथाशीघ्र अगाडि बढाउने प्रधानमन्त्रीले आश्वासन दिएको सुदूरपश्चिम प्रदेशका गृहमन्त्री शिवराज भट्टले जानकारी दिए । 

प्रदेशका गृहमन्त्रीहरुले आज प्रधानमन्त्री प्रचण्ड र गृहमन्त्री नारायणकाजी श्र्ष्ठसँग भेटेर प्रहरी समायोजनका लागि पहल गर्न आग्रह गरेका थिए । भट्टले प्रधानमन्त्री प्रचण्ड र उपप्रधानमन्त्री श्रेष्ठले प्रहरी समायोजनको प्रक्रिया अगाडि बढाउने आश्वासन दिएको बताए । प्रहरी समायोजन छैन, निजामती सेवा ऐन छैन । यी सबै समस्या चाँडा समाधान गर्न आफूहरुले आग्रह गरेको उनले बताए । 

प्रहरी समायोजनका लागि चाहिने दुई वटा संघीय कानुन भने बनिसकेको छ । प्रहरी समायोजन ऐन २८ माघ २०७६ मै राष्ट्रपतिबाट प्रमाणीकरण भएको थियो भने नेपाल प्रहरी र प्रदेश प्रहरी (कार्य सञ्चालन, सुपरीवेक्षण र समन्वय) ऐन २०७७ साल भदौ १२ गते प्रमाणीकरण भएको थियो । दुई कानुनका आधारमा छिटोभन्दा छिटो प्रहरी समायोजन हुनुपर्ने प्रदेशका गृहमन्त्रीहरुको माग छ ।

प्रदेशसभामा भएका सबै दलको समर्थन जुटाएर आएको मुख्यमन्त्री सरोजकुमार यादव नेतृत्वको टोलीले प्रधानमन्त्री प्रचण्डलाई ६ बुँदे ज्ञापनपत्र बुझाएको थियो । जसमा प्रदेश प्रहरी समायोजन, संघीय निजामती सेवा ऐन, सार्वजनिक जग्गाको प्रयोग, अर्थसम्बन्धी समस्या लगायतका माग छन् ।