भूकम्प प्रभावित क्षेत्रमा सुरक्षाकर्मी परिचालन गरेर अस्थायी आवास बनाउने सरकारको निर्णय

१३ मंसिर, काठमाडौं । सरकारले जाजरकोट केन्द्रबिन्दु भएर गएको भूकम्प प्रभावितको अस्थायी आवास निर्माण गर्न सुरक्षाकर्मी परिचालन गर्ने निर्णय गरेको छ । बुधबार बसेको मन्त्रिपरिषद्को बैठकले आवश्यकताअनुसार नेपाली सेना, सशस्त्र प्रहरी र नेपाल प्रहरी परिचालन गरी आवास बनाउने निर्णय गरेको हो । 
 
मन्त्रिपरिषदले प्रभावित क्षेत्रमा जिल्लामा उपलब्ध जनशक्तिले नपुगे अरु बाहिरबाट जनजनशक्ति उपलब्ध गराइने निर्णय भएको सरकारको प्रवक्ता समेत रहेकी सूचना तथा सञ्चार प्रविधिमन्त्री रेखा शर्माले जानकारी दिइन् । उनका अनुसार भूकम्प पीडितको अस्थायी आवास निर्माण भएको गुनासो आएकाले प्रभावितलाई सुरक्षित अस्थायी आवास उपलब्ध गराउन जिल्ला सुरक्षा समितिको सिफारिसका आधारमा सुरक्षाकर्मी परिचालन गरिनेछ ।