सरकारले चार महिनामा घरजग्गा कारोबारबाट उठायो १२ अर्ब २० करोड राजश्व

१३ मंसिर, काठमाडौं । सरकारले गएको चार महिनामा घरजग्गाको कारोबारबाट १२ अर्ब २० करोड ६१ लाख ६४ हजार राजस्व प्राप्त गरेको छ । सरकारले साउनमा २ अर्ब ९१ करोड ४ लाख २७ हजार, भदौमा ३ अर्ब ४ करोड ५९ लाख ४७ हजार, असोजमा ४ अर्ब ८ करोड ६६ लाख २९ हजार राजस्व उठाएको छ । 

गत आर्थिक वर्षको यही अवधिमा सकारले घरजग्गाको कारोबारबाट ११ अर्ब ८७ करोड ७१ लाख २२ हजार राजस्व उठाएको थियो । कात्तिकमा मात्रै ३ अर्ब ७६ लाख २६ हजार राजस्व संकलन भएको थियो । देशभर कात्तिक महिनामा घरजग्गा कारोबार भने घटेको छ । भूमि व्यवस्थापन तथा अभिलेखालय विभागका अनुसार असोजको तुलनामा कात्तिक महिनामा घरजग्गा कारोबार घटेको हो । 

कात्तिकमा घरजग्गा कारोबारको सेवा कर, रजिस्ट्रेसन दस्तुर र पुँजीगत समेत २ अर्ब १६ करोड ३१ लाख ६१ हजार संकलन भएको छ । जसमध्ये सेवा कर २० करोड १५ लाख ३५ हजार रजिस्ट्रेसन दस्तुर १ अर्ब ३७ करोड ८ लाख ४४ हजार, पुँजीगत लाभकर ७७ करोड ९ लाख १६ हजार लाभकर संकलन भएको विभागले जनाएको छ । कात्तिकमा मात्रै सरकारले २० करोड २२ लाख ९० हजार राजस्व छुट दिएको छ ।
 
असोजको तुलनामा कात्तिकमा देशभर घरजग्गा कारोबार ३४ प्रतिशतले कमी आएको छ । असोज महिनामा देशभर ३९ हजार ८८१ को संख्यामा घरजग्गा कारोबार भए पनि कात्तिक महिनामा घटेर २६ हजार ४६ संख्यामा घरजग्गा कारोबार भएको छ । गत वर्षको कात्तिकको तुलनामा यस वर्षको कात्तिकमा भने समग्रमा ६ प्रतिशतले मात्र घरजग्गा कारोबारमा कमी आएको हो ।