एनसेलबाट बाहिरिने आजियाटाको घोषणा, सबै शेयर बिक्रीमा

१३ मंसिर, काठमाडौं । नेपालमा रहेको दूरसञ्चार सेवा प्रदायक कम्पनी एनसेलबाट आजियाटाले बाहिरिने निर्णय गरेको छ । एनसेलमा रहको सबै लगानी फिर्ता लान बिक्रीमा राखिएको उसले जनाएको छ । एनसेलबाट बाहिरिने उद्देश्यका साथ आजियाटाले यसको सम्पत्ति बिक्रीमा राखेको कुरा बुधबार एक विज्ञप्ति जारी गर्दै जानकारी दिएको हो । 

कम्पनीका अनुसार आजियाटाले बिक्री गर्ने शेयर नेपाली साझेदारहरू सतिशलाल आचार्य र सचिनलाल आचार्यले किन्ने तयारी गरेको बताइएको छ । हाल एनसेलमा आचार्यद्वयको २० प्रतिशत शेयर रहेको छ । एनसेलको सम्पत्ति बिक्रीमा राखिएकाले आजियाटालाई १ अर्ब ३० करोड मलेसियन रिंगिट खुद घाटा रहेको विज्ञप्तिमा जनाएको छ । एनसेलको शेयर ७ वर्ष अगाडि आजियाटाले किनेको थियो । आजियाटालाई स्वीडेनको टेलिया सोनेराले कम्पनीले शेयर बेचेको थियो ।
 
आजियाटाले नेपालको परिस्थिति चुनौतीपूर्ण बन्दै गएका कारण बोर्डले नेपालबाट बाहिरिने निर्णय गरेको जनाएको छ । आजियाटा समूहका प्रमुख कार्यकारी अधिकृत तथा प्रबन्ध निर्देशक विवेक सुदले नेपालबाट बाहिरिने भएसँगै कम्पनीको ८० प्रतिशत शेयर बिक्रीको प्रक्रिया राखिएको बताएका छन् ।

एनसेलमा मलेसियाको आजियाटा समूह बर्हाडको ८० प्रतिशत शेयर स्वामित्व रहेको छ ।  बाँकी २० प्रतिशत शेयर सुनिभेरा क्यापिटल भेन्चर प्रालिको छ । नेपालमा एनसेलको व्यापार घट्दै गएका बेला आजियाटाले यस्तो निर्णय गरेको हो । 

सन् २०२२/२३ मा एनसेलले ३७ अर्ब ४४ करोड २० लाख रूपैयाँको व्यापार गरेको थियो । एनसेलले सन् २०२१/२२ मा ३९ अर्ब ७२ करोड ५० लाख र सन् २०२०÷२१ मा एनसेलले ४० अर्ब ४२ करोड रूपैयाँको व्यापार गरेको थियो ।