कांग्रेसको आगामी महासमिति बैठकमा प्रस्तुत हुने कार्यपत्र बारे महामन्त्रीद्वारा पदाधिकारीलाई जानकारी

१३ मंसिर, काठमाडौं । नेपाली कांग्रेसका महामन्त्री द्वय विश्वप्रकाश शर्मा र गगन थापाले मंसिर २९ देखि पुस २ सम्म काठमाडौंमा हुने महासमितिको बैठकमा प्रस्तुत हुने कार्यपत्र बारे आजको पदाधिकारी बैठकमा जानकारी गराएका छन् । सभापति शेरबहादुर देउवाको निवास धुम्बाराहीमा बसेको पदाधिकारी तथा पूर्वपदाधिकारी बैठकमा आसन्न महासमितिको बैठकको तयारी सम्बन्धको छलफलमा कार्यपत्र बारे  जानकारी गराइएको हो । 

बैठकमा महासमिति बैठकको तयारीसँगै जाजरकोट र रुकुम पश्चिम क्षेत्रका भूकम्प प्रभावितलाई चाँडो भन्दा चाँडो अस्थायी आवास निर्माण गर्ने तथा राहत वितरण गर्ने सम्बन्धमा छलफल भएको छ । बैठकपछि सञ्चारकर्मीसँग कुरा गर्दै नेता प्रकाशशरण महतले भूकम्प प्रभावित क्षेत्रमा अस्थायी तथा दीर्घकालीन पुनर्निर्माणका लागि सुरुदेखि नै गम्भीरताका साथ कार्य गर्दै आएको र थप कार्यबारे छलफल भएको बताए । 

महासमिति बैठक, भूकम्प प्रभावित जाजरकोट, रुकुम पश्चिम र त्यहाँको राहत, उपचार, अस्थायी बसोबास, दीर्घकालीन् पुनर्निर्माणको विषयमा छलफल भएको छ । महासमितिको बैठकलाई कसरी भव्य तरिकाले सम्पन्न गर्ने, जनसरोकार तथा समसामयिक विषय र राष्ट्रिय महत्वका विषयमा सुस्पष्ट ढंगबाट प्रस्तुत एवं छलफल गर्ने गराउने विषयमा बैठकमा छलफल भएको महतले बताए । 

यस लगायत विविध शीर्षकसहितको कार्यपत्र तयारी सम्बन्धमा महामन्त्री द्वय गगन थापा र विश्वप्रकाश शर्माले कहाँ कसरी अगाडि बढिरहेको छ भनेर छलफल गरेको र कार्यपत्र बारे जानकारी गराएको उनले बताए । महासमिति बैठकको विषयवस्तुबारे केन्द्रीय कार्य सम्पादन समितिको बैठक र केन्द्रीय कार्य समितिको बैठक बसेर अन्तिम रुप दिइने उनको भनाइ छ ।