एमालेको मध्य पहाडी लोकमार्ग पद यात्रा सुरू, ओलीले झन्डा फहराएर गरे अभियानको उद्घाटन

१४ मंसिर, काठमाडौं । नेकपा एमालेको मध्य पहाडी लोकमार्ग केन्द्रित विशेष अभियान सुरु भएको छ । बैतडीको झुलाघाटमा अध्यक्ष केपी शर्मा ओलीले झण्डा फहराएर अभियानको  आज बिहान उद्‍घाटन गरेका हुन् । 

एमाले पाँचथरको चिवाभञ्ज्याङसम्मको यात्रामा निस्किएको हो । उसले लोकमार्ग केन्द्रित अभियानलाई ‘समृद्धिका लागि समृद्धिको यात्रा’ नारा दिएको छ । एक हजार ८७९ किलोमिटर लामो लोकमार्गको यात्राका क्रममा जनताको गुनासो सुन्ने एमालेले जनाएको छ ।

पहिलो दिन आजको सभा बैतडीको गोठाला पानीमा गर्ने तय भएको छ । यात्रालाई निरन्तरता दिँदै पुस २ गते काठमाडौं फर्कने बताइएको छ । पुस ५ गते यात्रा समापनसहित आफ्ना दृष्टिकोण सार्वजनिक गरिने महासचिव शंकर पोखरेलले जानकारी दिए । 

यात्राका क्रममा लोकमार्गलाई फास्ट ट्रयाकका रुपमा अघि बढाउने सम्भावनाको खोजी गरिने उनले बताए । यात्रामा भविष्यमा व्यावसायिक विषयको खोजी र भ्रमको निवारण गरिने जानकारी दिए ।