जनता ढुक्क भएर बसे हुन्छ, देश बनाउने जिम्मा एमालेको होः ओली

१४ मंसिर, बैतडी । नेकपा एमालेका अध्यक्ष केपी शर्मा ओलीले देश बनाउने जिम्मा एमालेले लिने बताएका छन् । बिहीबार गोठलापानीमा ‘झुलाघाट–चिवा भन्ज्याङ यात्रा’को आरम्भ गर्दै अध्यक्ष ओलीले यस देशमा नेकपा एमाले रहेको भन्दै देशलाई पराधीन हुन नदिने दाबी गरे । 

ओलीले पहिचानका नाममा जनतालाई विभाजित गर्न खोजिएको बताए । पहिचानको मुद्दा सबैभन्दा बढी एमालेले सम्बोधन गरेको जिकिर गरे । यस देशको भूगोलको रक्षा एमालेले गर्छ । सार्वभौम सत्ताको रक्षा एमालेले गर्छ । देशको स्वाधीनता, स्वतन्त्रता र राष्ट्रिय हितको रक्षा एमालेले गर्छ’, ओलीले भने, ‘जनताका हितका निम्ति गर्नुपर्ने काम एमालेले गर्छ । आवश्यक कदम चाल्छ ।’ 

ओलीले एमालेले विकासलाई साकार बनाइ छाड्ने भन्दै एमालेको नेतृत्वमा गरिबीबाट देशलाई मुक्त गरेर समृद्ध र धनी देश बनाउने बताए । उनले एमालेले कुनै पनि नाउमा जनता भाँड्ने र जनतालाई अलग थलग पार्दै जनताका बीचमा मारमुङ्ग्री मच्चाउने किसिमका क्रियाकलापलाई अगाडि बढ्न नदिने बताए ।  उनले देश बनाउने जिम्मा एमालेले लिने भन्दै ढुक्क रहन आग्रह पनि गरे ।