खाँण र रायमाझीसहितका थुनामा रहेका अभियुक्तहरुको पुनरावेदन निवेदनमाथिको सुनुवाइ सकियो, भोलि आदेश

१४ मंसिर, काठमाडौं । उच्च अदालत पाटनमा नक्कली भुटानी शरणार्थी प्रकरणमा पुर्पक्षका लागि थुनामा रहेका अभियुक्तहरूको पुनरावेदन निवेदनमाथि सुनुवाइ सकिएको छ । आज सुनुवाइ सकिए पनि समय अपुग भएर आदेश भने भोलि शुक्रबार सुनाइने भएको छ । 

बिहीबार न्यायाधीश प्रकाश खरेल र जनक पाण्डेको इजलासले सुनुवाइ सकेको छ र शुक्रबार आदेश सुनाउने उच्च अदालतको तयारी छ । नेपाली नागरिकलाई नक्कली भुटानी शरणार्थी बनाएर अमेरिका पठाउने ठगी धन्दामा संलग्नको आरोपमा पक्राउ परेका नेपाली कांग्रेसका नेता बालकृष्ण खाँण, एमाले नेता टोपबहादुर रायमाझी, इन्द्रजित राई, तत्कालीन गृहसचिव टेकनारायण पाण्डेलगायत २० जना थुनामा छन् । 

उनीहरूले आफूलाई पुर्पक्षका लागि थुनामा पठाउने जिल्ला अदालतको आदेश त्रुटिपूर्ण रहेको भन्दै उच्च अदालतमा पुनरावेदन गरेका थिए । उक्त पुनरावेदन निवेदनमाथि सुनुवाइ सकेको उच्च अदालतले बिहीबार उनीहरू थुनामा नै रहने, धरौटीमा छुट्ने वा साधारण तारेखमा छुट्ने आदेश गर्न सक्नेछ । 

राजनीतिक दवावका कारण खाँण र रायमाझी तारेख आदेशमा छुट्न सक्ने अनुमान गरिएको छ । केही दिन अघि नेपाली कांग्रेसका सभापति शेरबहादुर देउवाले पनि लुम्बिनीमा पुगेर खाँण चाँडै जेलमुक्त हुने बताएका थिए । आज पनि उनीहरू छुट्ने आशामा शुभचिन्तकहरु अदालत पुगेका थिए ।