एनसेलबाट औपचारिक रुपमा बाहिरियो आजियटा, सतिललाल आचार्यले साढे ६ अर्बमा किने सबै शेयर

१५ मंसिर, काठमाडौं । मलेसियन कम्पनी आजियटा समूह बरहादले १ खर्ब ४३ अर्ब रूपैयाँमा किनेको नेपालको दूरसञ्चार सेवा प्रदायक एनसेलको ८० प्रतिशत शेयर जम्मा ६ अर्बमा बिक्री भएको छ । शुक्रबार जारी गरेको विज्ञप्ति अनुसार बेलायती कम्पनी स्पेक्ट्रलाइट यूकेले आफ्नो ८० प्रतिशत  शेयर खरिद गरेको आजियटाले जनाएको छ  ।

एनसेलको ८० प्रतिशत शेयर सतिशलाल आचार्यको बेलायतमा रहेको एक कम्पनीले खरिद गरेको छ । आचार्य सिंगापुरमा बस्ने नेपाली व्यवसायी हुन् । यसअघि उनको स्वामित्वमा एनसेलको २० प्रतिशत शेयर रहेको थियो । आजियटा समूहले नेपालको एनसेलमा रहेको आफ्नो ८० प्रतिशत शेयर बिक्री गरेर बाहिरिने निर्णय यसअघि नै गरेको थियो । सो शेयर आचार्यको नेतृत्वमा बेलायतमा रहेको कम्पनी स्पेक्ट्रलाइट युकेले खरिद गरेको हो ।

उक्त कम्पनी आचार्य र डेन्टन्स् सेक्रेटरिज लिमिटेडको संयुक्त स्वामित्वमा छ । स्पेक्ट्रलाइट केही महिनाअघि मात्रै खुलेको देखिन्छ । आजियटाको ८० प्रतिशत शेयर ५० मिलियन अमेरिकी डलर अर्थात् ६ अर्ब ६६ करोड नेपाली रूपैयाँमा किनबेच भएको जनाइएको छ । अब एनसेलको पूर्ण स्वामित्व नेपालीकै हातमा आएको छ । 

आचार्यले कम्पनीको शेयर खरिदपछिको संक्षिप्त प्रतिक्रियामा भनेका छन्, म यो सम्झौताबाट खुशी छु । दूरसञ्चार उद्योगमा रहेको मेरो अनुभवलाई लिएर एनसेलको व्यवस्थापनसँग नयाँ आविस्कार, लगानी र नेपाली जनतालाई सेवा उपलब्ध गराउने कार्यमा रहनेछु ।

बुधबार मात्रै आजिएटाले नेपालमा व्यावसायिक चुनौतीहरू बढ्दै गएकाले नेपालबाट बाहिरिने निर्णय गरेको घोषणा गरेको थियो । आजिएटाले कुल ५ करोड अमेरिकी डलरमा शेयर बिक्री गरेको र यसमध्ये ५० लाख अमेरिकी डलर ६ महिनाभित्र भुक्त्तानी गर्नुपर्ने खरिद सम्झौता भएको उल्लेख गरेको छ ।

दूरसञ्चार क्षेत्रका जानकारहरूले एनसेलको सकिनै लागेको अनुमतिपत्रको मुद्दा, नवीकरणका लागि चाहिने ठूलो धनराशि र दूरसञ्चार कम्पनीको घट्दो आम्दानीका कारण आजिएटा बाहिरिएको अनुमान गरेका छन् । १६ भदौ २०६१ मा एनसेलले जीएसएम मोबाइल सेवाका लागि अनुमति प्राप्त गरेको थियो । आजियटा भने सन् २०१६ मा नेपालमा भित्रिएको थियो । त्यो बेला १ अर्ब ३६ करोड अमेरिकी डलर (त्यसबेलाको विनियमदर अनुसार १ खर्ब ४३ अर्ब रूपैयाँ) मा एनसेलको शेयर आजियटाले किनेको थियो ।