यात्रुले बोकेको पावरब्यांक पड्किँदा त्रिभुवन अन्तर्राष्ट्रिय विमानस्थलभित्र आगलागी, अवस्था सामान्य

 १७ मंसिर, काठमाडौं । त्रिभुवन अन्तर्राष्ट्रिय विमानस्थलभित्र एक यात्रुले बोकेको ह्याण्डब्यागमा पावरब्यांक पड्किएर आगो लागेको छ । बोर्डिङ पास लिएर विमानमा चढ्नुभन्दा अगाडि प्रतीक्षालयमा बसिरहेका यात्रुको ह्याण्डब्यागमा आगो लागेको हाे । बिहान साढे ११ बजेको उडानमार्फत ति यात्रु चीन जान लागेका थिए ।

विमानस्थलमा बोर्डिङ पास लिएर विमानमा चढ्ने प्रतीक्षामा रहेका चिनियाँ यात्रुले झोलामा राखेको पावरब्यांकमा चार्ज गरेरै आइप्याड चलाइरहेको बेला पावरब्यांक पड्किएर झोलामा आगो लागेको थियो ।

एयर चाइनाको जहाजबाट चीन जान लागेका यात्रुले बोकेको ह्याण्डब्यागमा आगो लागेपछि तत्काल निभाइएको त्रिभुवन अन्तर्राष्ट्रिय विमानस्थलका प्रवक्ता सुभाष साहले जानकारी दिए ।

उनका अनुसार ती यात्रुले ब्यागभित्र रहेको पावरब्यांकमा जोडेर आइप्याड चलाइरहेका थिए । सो घटनापछि ड्युटीमा रहेका प्रहरी र विमानस्थलका कर्मचारीहरूले तत्काल आगो नियन्त्रणमा लिएका थिए ।

अहिले यात्रु स-कुशल छन् विमानस्थलले जनाएकाे छ। विमानस्थलको अवस्था सामान्य रहेकाे र भौतिक क्षति केही पनि भएको प्रहरीले जनाएकाे छ ।