मुख्यमन्त्री कार्कीले बल्ल तोके तीन मन्त्रीको जिम्मेवारी

१७ मंसिर, विराटनगर । कोशी प्रदेशका मन्त्रीहरूको कार्य विभाजन भएको छ । मुख्यमन्त्री केदार कार्कीको सिफारिसमा प्रदेश प्रमुख पर्शुराम खापुङले तीन मन्त्रीहरूको कार्य जिम्मेवारी तोकेका हुन् । कोशी प्रदेशका मुख्यमन्त्री केदार कार्कीले तीन जना मन्त्रीलाई जिम्मेवारी तोकेका छन् । शमशेर राईलाई आन्तरिक मामिला तथा कानुन मन्त्रालयको जिम्मेवारी दिइएको छ । उनी नेपाली कांग्रेसबाट मन्त्री बनेका हुन् ।

यस्तै नेकपा माओवादीबाट मन्त्री भएका गणेशप्रसाद उप्रेतीलाई पर्यटन, वन तथा वातावरण मन्त्रालयको जिम्मेवारी दिइएको छ । नेकपा एकीकृत समाजवादीबाट मन्त्री बनेका कमलप्रसाद जबेगूलाई भौतिक पूर्वाधार विकास मन्त्रालयको जिम्मेवारी दिइएको हो । अरू मन्त्रीहरू नियुक्त गर्न बाँकी रहेकाले बाँकी मन्त्रालय मुख्यमन्त्री कार्की आफैंले राखेको प्रदेश प्रदेश प्रमुखको कार्यालयले जनाएको छ ।

 गत असोज २७ गते कार्की मुख्यमन्त्री नियुक्त भएका थिए । सुरुमा कांग्रेसका ८ र नेकपा (एमाले) का ३९ सांसदको समर्थनमा कार्की मुख्यमन्त्री बनेका थिए । तर कार्कीलाई सत्ता गठबन्धनले नै विश्वासको मत दिएको थियो । एमालेले पनि विश्वासको मत दिएर प्रतिपक्षमा बस्ने निर्णय गरेको थियो । पुर्ववत सहमतिअनुसार मुख्यमन्त्री कार्की अघि नबढेको भन्दै एमालेले गत कात्तिक १८ गते सरकार छाडेको थियो । एमालेबाट मन्त्री बनेका रामबहादुर राना मगरले कात्तिक १८ मा राजीनामा बुझाएका थिए ।