गणतन्त्रको विरोधमा राजतन्त्रको कुरा गर्नेहरु देशद्रोही हुन, उनीहरुलाई राज्यले कारवाही गर्नुपर्छः ओली

१७ मंसिर, काठमाडौं । नेकपा एमालेका अध्यक्ष केपी शर्मा ओलीले गणतन्त्रको विरोधमा लागेकाहरू देशद्रोही भएकाले सरकारले उनीहरूमाथि कारबाही गर्नुपर्ने बताएका छन् । देशद्रोहको भावना लिएर व्यवस्थामाथि प्रहार गर्नेहरूलाई सरकारले कारबाही गर्न नसक्नु दुःखद भएको ओलीको भनाइ छ ।  

अहिलेको व्यवस्था विरुद्ध वितृष्ण फैलाउन अनेक तत्वहरूले काम गरिरहेका बताउँदै ओलीले गणतन्त्रको विरोधमा लागेर राजा ल्याउँछौ भन्दै हिँडेकाहरु मनोबल सरकार आफैले बढाइरहेको ओलीले बताए । ओलीले आइतबार दैलेखको राकममा आयोजित सभालाई सम्बोधन गर्दै प्रतिक्रियावादीहरु गणतन्त्रलाई उल्टाउने प्रयासमा लागे पनि उनीहरूको यो कुचेष्टा सफल नहुने दाबी गरे ।

उनले भने, आज कोही प्रतिगमन तिर फर्कने कुरा गर्दैछ भने त्यो देशद्रोही हो, त्यो लोकतन्त्र विरोधी हो, त्यो जनतालाई गरिब राख्न खोज्ने कुरा हो, यस्ता गतिविधि चलाउनेलाई सरकारले समयमै रोक्न सक्नुपर्छ । लोकतन्त्रको विरोधमा बोल्ने र त्यसबारे सोच्ने व्यक्ति नेपाल र नेपालीको हितको पक्षमा नरहेको स्पष्ट पार्दै ओलीले भने, त्यो नेपाल र नेपालीको हित विपरीतको कुरा हुन्छ । सरकार सचेत हुनुपर्छ । 

अहिले देशको अर्थतन्त्र चौपट भएर देशमा गरिबी बढेको भन्दै ओलीले एमाले सरकारमा छँदा युवा बिदेसिने क्रम घटेको, देशमा स्वरोजगारी बढेको र देश विकासले गति लिएको स्मरण गराए । ‘फेरि पनि एमाले चाहिन्छ देश विकासको लागि, देशलाई विकासको बाटोमा अघि बढाउनको लागि नेकपा एमालेको एकल बहुमतको सरकार चाहिन्छ’, पूर्वप्रधानमन्त्री ओलीको भनाइ छ ।