नेत्रबिक्रम चन्दसहित चार नेताविरुद्ध पक्राउ पुर्जी जारी

१८ मंसिर, काठमाडौं । नेपाल कम्युनिष्ट पार्टीका महासचिव नेत्रबिक्रम चन्दसहितका चार नेतालाई पक्राउ गर्न पुर्जी जारी गरिएको छ । जिल्ला अदालत काठमाडौंले नेकपाका महासचिव चन्दसहित चार जना नेताविरुद्ध पक्राउ पुर्जी जारी गरेको हो । 

सरकारले दर्ता गरेको राज्य विरुद्धको कसुरका दुई मुद्दामा उनीहरूलाई ३५ दिनभित्र अदालतमा उपस्थित हुन भनिएको छ । महासचिव विप्लव, पोलिटब्युरो सदस्य खड्गबहादुर विश्वकर्मा, माइला लामा, अखिल नेपाल किसान महासंघका अध्यक्ष राजु कार्कीको नाममा अदालतमा उपस्थित हुनका लागि सूचना जारी गरिएको छ । 

त्यस्तै राज्य विरुद्धको कसुरको अर्को मुद्दामा माइला लामा र विप्लव विरुद्ध पक्राउ पुर्जी जारी भएको छ । ९ असोज २०७६ मा दायर भएको मुद्दामा उनीहरूमाथि संघीय इकाइहरु बीच तथा विभिन्न जातजाति वा सम्प्रदायहरु बीचको सु-सम्बन्धमा खलल पारेर राज्य विरुद्धको कसुर गरेको अभियोग लगाइएको थियो । 

उनीहरू फरार भएको, प्रहरीले अदालतमा उपस्थित गराउन नसकेको भनेपछि इजलासले नै उनीहरूलाई उपस्थित गराउनु भनी ३५ दिने वारेन्ट जारी गर्न आदेश दिएको थियो । १० मंसिरमा इजलासबाट भएको आदेश अनुसार जिल्ला अदालत प्रशासनले गोरखापत्रमा सूचना निकालेको हो ।