सार्वजनिक लेखा समितिले एनसेलको शेयर बिक्रीबारे सरोकारवाला पक्षसँग छलफल गर्ने

१९ मंसिर, काठमाडौं । सार्वजनिक लेखा समितिले एनसेलको शेयर खरिद–बिक्री सम्बन्धमा सरोकारवाला पक्षसँग प्रारम्भिक छलफल गर्ने भएको छ । समितिले छलफलका लागि बुधबार दिउँसो २ बजे बैठक बोलाएको छ । बैठक सिंहदरबारस्थित भवन नं. १ को समितिको बैठक हलमा नै बस्नेछ ।

एनसेलमा रहेको आफ्नो ८० प्रतिशत शेयर मलेसियन कम्पनी आजियाटाले पाँच करोड डलरमा हाल एनसेलकै साझेदार सतिशलाल आचार्यको बेलायती कम्पनी स्पेक्ट्रलाइट यूकेलाई बेच्ने सहमति भएको छ । तर, नेपाल दूरसञ्चार प्राधिकरणलाई भने हालसम्म जानकारी दिइएको छैन ।

समितिले दूरसञ्चार प्रधिकरण, राजश्व र अर्थमन्त्रालयका प्रतिनिधिसँग छलफल गर्ने जनाएको छ । राजश्वका कारण आजियटाले कम मूल्य देखाएर शेयर बिक्री गरेको अशंका गरिएको छ ।