आजियाटा र बेलायतको कम्पनीबीच भएको शेयर खरिद बिक्रीसम्बन्धीका कागजातहरु मगाइएको छः एनसेल

२० मंसिर, काठमाडौं । निजी क्षेत्रको दूरसञ्चार सेवा प्रदायका कम्पनी एनसेलले आफ्नो स्वामित्व रहेको रेनाल्ड होल्डिङको शतप्रतिशत शेयर खरिद बिक्रीका लागि आजियटा र यूके स्पेक्ट्रलाइटबीच भएको सहमतिका काजपत्रहरु मगाइएको जनाएको छ । एनसेले नेपाल दूरसञ्चार प्राधिकरणलाई पत्र पठाउँदै सो सहमतिको कागजात पत्र अध्ययनका लागि माग गरिएको जनाएको छ । 

मलेसियाको आजियटा कम्पनीले नेपाल दूरसञ्चार प्राधिकरणको पूर्वस्वीकृति र जानकारीविनै एनसेलको ८० प्रतिशत शेयर बेचेर नेपाल छाड्न लागेको बारे प्राधिकरणले मंसिर १५ मा लेखेको पत्रको एनसेलले प्रतिवद्धतासहितको जवाफ पठाएको हो ।

शेयर खरिदबिक्रीबारे एनसेलले गराएको जानकारी पत्रमा बेलायतको कम्पनीसँग भएगरेका शेयर खरिद बिक्रीसम्बन्धी द्विपक्षीय सम्झौताका कागजातहरु तदारुकताका साथ सम्बन्धित पक्षहरुबाट संकलन गर्ने काम भइरहेको एनसेलले बताएको छ ।

पत्रमा एनसेलले आफूहरू कानूनको शासनमा विश्वास गर्ने जिकिर गरिएको छ । प्राधिकरणको विनियमावली बमोजिम शेयर खरिदबिक्री स्वीकृतिका लागि निवेदन पेश गरिने प्रतिवद्धता पत्रमा जनाइएको छ । प्राधिकरणले शुक्रबार एनसेल आजियटालाई पत्र लेखेर शेयर खरिदबिक्रीबारे ध्यानाकर्षण भएको जनाएको थियो ।

दूरसञ्चार नियमावली, २०५४ को नियम १५ (८) बमोजिम चुक्ता पूँजीको पाँच प्रतिशतभन्दा बढी शेयर खरिद वा बिक्री गर्नुअघि प्राधिकरणको स्वीकृति लिनुपर्ने व्यवस्था छ । तर, एनसेलले त्यस्तो अनुमति नै नलिइ शेयर बिक्री गर्ने तयारी गरेको थियो ।