१५ लाख धरोटी बुझाउन नसकेर भुटानी शरणार्थी नेता टेकनाथ रिजाल अझै जेलमा

२१ मंसिर, काठमाडौं । उच्च अदालत पाटनले तोकेको धरौटी बुझाउन नसकेर भुटानी शरणार्थी नेता टेकनाथ रिजाल अझै जेलमुक्त हुन सकेका छैनन् । नक्कली भुटानी शरणार्थी प्रकरणमा पुर्पक्षका लागि जेल चलान भएका उनीलाई १५ लाख धरौटी रिहा गर्न अदालतले आदेश दिएको थियो । 

उच्च अदालतका न्यायाधीशद्वय जनक पाण्डे र प्रकाश खरेलको संयुक्त इजलासले मंसिर १५ मा सन्दीप सहितका ६ जनालाई धरौटीमा छाड्न आदेश गरेको थियो । धरौटीमा छाड्न आदेश भएका अरु बाहेक भुटानी शरणार्थी नेता टेकनाथ रिजाल मात्र थुनामा छन् ।
 
रिजालले धरौटी बुझाएका छैनन् । उनलाई अदालतले १५ लाख धरौटी लिएर रिहा गर्न आदेश गरेको थियो । कारागारमा सँगै बस्नेहरूसँग धरौटी रकमबारे रिजालले भनेका छन ‘त्यति धेरै पैसा तिर्न सक्ने अवस्था छैन । कसैले दिने अवस्था पनि छैन, मैले कहाँबाट ल्याएर तिर्नु । 

नक्कली भुटानी शरणार्थी प्रकरणमा संलग्न ६ जना भने कारागारबाट रिहा भएका छन् । उच्च अदालत पाटनले तोकेको धरौटी बुझाउने ५ जना र साधारण ताखेरमा छाड्न आदेश भएका आशिष बुढाथोकी छुटेका हुन् । धरौटी तिरेर रिहा हुनेमा शमशेर मियाँ, नरेन्द्र केसी, हरिभक्त महर्जन, रामशरण केसी र सन्दीप रायमाझी छन् ।

धरौटी रकम बुझाएका ५ जनालाई प्रहरीले सम्पत्ति शुद्धीकरण अनुसन्धान विभाग र अख्तियार दुरुपयोग अनुसन्धान आयोगमा उपस्थित गराएको छ । सम्पत्ति शुद्धीकरण अनुसन्धान विभागले पनि अभियुक्तहरूसँग धरौटी लिएर छाड्ने निर्णय गरेको हो । अख्तियार दुरुपयोग अनुसन्धान आयोगका अधिकारीहरूले रायमाझीसहित ५ जनालाई साधारण तारेखमा रिहा गर्ने निर्णय गरेका हुन् ।