ओलीका भाषण तथ्यमाभन्दा निरासा फैलाउने अभिप्रायमा प्रेरित

२१ मंसिर, काठमाडौं । नेकपा एमालेले सुरु गरेको समृद्धिका लागि संकल्प यात्राका क्रममा अध्यक्ष ओलीले निरन्तरण सम्बोधन गरिरहेका छन् । उनका अधिकांश सम्बोधन तथ्यमा नभएर आरोपका लागि मात्र प्ररित भएको देखिन्छ । अधिकांश भाषण निरासा फैलाउने अभिप्रायमा केन्द्रित भएको देखिन्छ । 

हुनत एमाले अध्यक्ष ओली विरोधीप्रति जहिले पनि गरमनै हुन् । उखान तुक्का र मार्मिक प्रहारले कहिले काँही उनले गरेका भाषण रोचक पनि हुन्छन । तर, ओली देशका नेता हुन । पूर्वप्रधानमन्त्री हुन । उनले बोलेको कुराले राष्ट्रिय र अन्तर्राष्ट्रिय जगतमा प्रभाव पार्छ । उनले गरेका हरेक भाषणमा एमाले मात्र देखेका छन् । एमाले मात्र सहि भनेका छन् । एमाले विना देश रहदैन भनेका छन् । 

बिहीबार बागलुङमा अध्यक्ष ओलीले वर्तमान सरकार राष्ट्रघाती र बेइमान भएको बताए ।  समृद्धिका लागि संकल्प यात्रा’ का क्रममा ८औं दिन बागलुङ बजारमा आयोजित सभालाई सम्बोधन गर्दै अध्यक्ष ओलीले सरकार र सरकारमा बसेका दलप्रति आक्रोश पोखेका छन् । 

नेपालको चरम असफलतामा गैरजिम्मेवार सरकार र गठबन्धन भएको पनि ओलीको आरोप छ । देशमा अराजकता बढाउने, गैरराजनीतिक कुसंस्कारलाई प्रश्रय दिने, जनतामा निराशा बढाउने यो सरकार लाज पचाएर कुर्सीमा बसेको छ, ओलीले भने, ‘यो सरकारले न विकास गर्छ, न राष्ट्रिय हितमा काम गर्छ ।’ यही सरकार रहिरहे देश बर्बाद हुन्छ । एमाले विना अब देश रहँदैन ।  

बुधबार बागलुङकै बुर्तिवाङमा आयोजित सभामा ‘राजनीतिबाट माथि उठेर विकासमा लाग्न’ कार्यकर्ता र अन्य राजनीतिक शक्तिलाई आह्वान गरेका ओली भोलिपल्टै सत्ता गठबन्धनप्रति आक्रामक देखिए । जहाँ–जहाँ सडक बनेका छैनन् त्यहाँ कांग्रेसले ठेक्का लिएको उनको भनाई थियो । सरकार त विकास गर्न नसक्ने लुते नै भएको उनले बताए । 

पोखरा विमानस्थल आफूले बनाएर छाडेको उल्लेख गर्दै उनले छिमेकीसँग डराएकाले सरकारले सञ्चालन गर्न नसकेको बताए । ‘यो सरकार कम्फरटेबलवाला हो, त्यसैले ऊ रिसाउँछ कि भनेर जहाज ल्याउन दिएको छैन,’ ओलीले भने, ‘न कुर्सी छाड्छ, न काम गर्छ, यस्तो देख्दा एमालेको मन पोलेको छ ।’ ओलीले मिसन–०८४ मार्फत एमालेले एकल सरकार बनाएर जनताका सपना पूरा गर्ने दाबी गरे ।

फरक प्रसंगमा अध्यक्ष ओलीले बैंकहरूले ब्याज बढाएर आम नेपालीलाई सास्ती दिएको उनको टिप्पणी थियो । उनले ऋणी र बचतकर्ता नभएसम्म बैंक बन्द हुने कुरा हेक्का राख्न सञ्चालकलाई चेतावनी दिए । ‘ऋणी भएनन्, बचतकर्ता भएनन् भने तिम्रा बैंक बन्द हुन्छन्,’ उनले भने, ‘चर्को ब्याज लगाएर जनतालाई मार्ने काम नगर ।’ बैंकप्रति ओली दुर्गा प्रसार्इंभन्दा पनि आक्रमक देखिए । 

मंसिर १४ गतेदेखि सुरु भएको २१ दिने अभियानमा संकलन गरिएका सबै माग र सुझाव बटुलेर राष्ट्रनिर्माणको खाका र योजना बनाउने ओलीले बताए । उक्त योजनाअनुसार मिसन–०८४ मार्फत एकल बहुमतको सरकार बनाएर देशलाई अगाडि बढाउने दाबीसमेत गरे । बिहीबार बागलुङको गलकोट, घोडाबाँधे र बागलुङ बजारमा एमालेले जनभेटघाट र सभासमेत गरेको थियो । अभियानमा एमाले वरिष्ठ उपाध्यक्ष ईश्वर पोखरेलसहित उपाध्यक्षहरू, महासचिव शंकर पोखरेललगायत सहभागी थिए । 

यसको अघिल्लो दिन पूर्वप्रधानमन्त्रीसमेत रहेका ओलीले गुल्मीको मुसिकोटमा आयोजित सभामा बोल्दै देश राष्ट्रियता र आर्थिक हिसाबले नाजुक अवस्थामा देश रहेको बताए । देश अत्यन्त अप्ठ्यारो अवस्थामा रहेको उनको भनााइ थियो । 

’अर्थतन्त्र ध्वस्त भइरहेकोले अहिले पहिलो चौमासिकमै कर्मचारीलाई तलब खुवाउन राष्ट्र ऋण उठाउनुपर्ने अवस्था देशमा आएको छ । रोजगारीका अवसरहरु गुमेकाले उद्योगधन्दा बन्द हुँदै गएकाले, नयाँ उद्योग नखुलेकोले देश अत्यन्त अप्ठ्यारो अवस्थामा भएको उनले बताए । उनले भने, ’हामी व्यापार घाटामा छौं । खाली आयात गर्ने, निर्यात गर्ने कुनै सामान उत्पादन गर्दैनौं । देशमा भ्रष्टाचार व्याप्त छ । कमिसनतन्त्र र तस्करी व्याप्त छ । यी सबै कुराहरुलाई फेर्न अब हामीले ढिलो गर्नु हुँदैन ।’

उनले एमालेलाई सरकारबाट हटाएर देशलाई यो दुर्दशामा पुर्याइएको भन्दै एमालेबाहेक अरुले यो देश बनाउन नसक्ने दाबी गरे । ’सरकारबाट एमाले बाहिर भयो भने २ वर्षभित्र देश कंगाल हुँदोरहेछ । देश बर्बाद हुँदैछ । त्यसबाट जोगाउन एमालेको एकल बहुमत चाहिन्छ,’ उनले भने ।

अध्यक्ष ओलीले भूकम्पपीडितका लागि सरकारबाट पर्याप्त काम नभएको समेत आरोप लगाए । ’हाम्रो सुझाव सरकारलाई छ, भूकम्प पीतितहरुको सकेसम्म छिटो व्यवस्थापन गरियोस्, पुनर्निर्माण गर्ने र उहाँहरुलाई पुनः बसोबास गराउने काम अविलम्ब सरकारले गरोस’, उनले भने ।

ओलीले मुसिकोट नगरपालिकाको नवनिर्मित भवन उद्घाटन गर्दा यही गतिमा जाने हो भने त देश ध्वस्त हुने भयो, यस्तै अवस्था रहने हो भने यो सरकारलाई विस्थापित गर्नुपर्ने हुनसक्छ भने । ओलीले देशमा आर्थिक संकट गहिरिँदै गएको बताए । वर्तमान सरकारले देशको अर्थतन्त्रलाई जोगाउन असफल भएको आरोप लगाए ।

झुलाघाट, बैतडीदेखि चिवाभञ्याङ पाँचथर यात्राका क्रममा आज रूकुम पूर्वको जिल्ला सदरमुकाम रूकुमकोटमा आयोजित सभामा बोल्दै उनले अहिले कर्मचारीलाई तलब खुवाउन पनि ऋण लिनुपर्ने अवस्था आएको भन्दै दुःख व्यक्त गरे । ’यही गतिमा जाने हो भने त देश ध्वस्त हुने भयो,’ उनले भने ’यस्तै अवस्था रहने हो भने यो सरकारलाई विस्थापित गर्नुपर्ने हुनसक्छ ।’

एमालेले स्थानीय माग र आवश्यकताहरूको पहिचान गरेर समाधनका उपायहरू खोज्न पुष्पलाल मध्यपहाडी लोकमार्गको यात्रा तय गरेको पनि ओलीको भनाइ थियो । यात्राका क्रममा अध्यक्ष ओलीको टिम हिजो राति रूकुमकोटमै बास बसेर सर्वपक्षीय छलफल तथा कोणसभाको आयोजना गरिएको थियो ।