तथ्याङ्क हेर्दा अर्थतन्त्रमा सुधारको अनुभूति हुन्छ, अब ब्यवहारमा देखाउने काम गर्नुपर्छः प्रधानमन्त्री प्रचण्ड

२१ मंसिर,काठमाडौं । प्रधानमन्त्री पुष्पकमल दाहाल प्रचण्डले ब्यवहारमै अर्थतन्त्र सुधार भएको देखाउन अझै केहि मिहिनेत गर्नुपर्ने बताएका छन् । । तथ्यांकले अर्थतन्त्रमा सुधारको संकेत गरेपनि व्यवहारमै देखा पर्ने गरी सुधार ल्याउन अझै मिहिनेत गर्नुपर्ने अवस्था रहेको उनले बताएका छन् । 

काठमाडौंमा राष्ट्रिय व्यवसायिक पहलले गरेको चौंथो जिम्मेवार व्यवसाय सम्मेलनमा प्रधानमन्त्री प्रचण्डले अर्थतन्त्र सुधारका लागि सरकारले विभिन्न नीतिहरू अवलम्बन गरेको र क्रमशः त्यसको प्रतिफल देखिने क्रम रहेको बताए ।

उनले भने, ‘तथ्याङ्क हेर्दा अर्थतन्त्रमा सुधारको अनुभूति हुँदै गएको देखिन्छ । तर, व्यवहारमा आम जनतामा आशाको रक्तसञ्चार सिर्जना गर्न अझै मिहिनेत गर्नुपर्ने परिस्थिति हाम्रा सामु छ । त्यसैले मैले अर्थतन्त्र सुधारमा केन्द्रित रहेर अझ वृहत् बैठक र केही नयाँ घोषणासमेत गर्ने तयारी गरिरहेको छु ।’ 

प्रधानमन्त्री प्रचण्डले अर्थतन्त्र सुधारका लागि आफूले देशभित्र लगानीको वातावरणसहित आशाको रक्तसञ्चार गर्न प्रयास गरिरहेको बताए । अर्थतन्त्रको क्षेत्रमा विद्यमान दवावलाई चिर्न र देशभित्र लगानीको वातावरणसहित आशाको रक्तसञ्चार गर्न लगातार प्रयास गर्दै आएको उनले बताए । 

केही दिन पहिला मात्र मैले सरकार, निजी क्षेत्र र आर्थिक क्षेत्रका विज्ञहरु सम्मिलित बैठकको आयोजना गरेर अर्थतन्त्रमा सुधार ल्याउन वृहत् अन्तक्रिया गरेको र अन्तरक्रियापछि केही महत्वपूर्ण घोषणाहरुसमेत गरिएको उनले बताए । प्रधानमन्त्री प्रचण्डले भने, ’मेरो विश्वास छ–उक्त अन्तरक्रिया र घोषणाले अर्थतन्त्रमा सुधार ल्याउन महत्वपूर्ण भूमिका खेल्नेछ ।’

उनले हालै दुबईमा भएको सम्मेलनमा पनि नेपाललाई लगानीको गन्तव्य बनाउन आग्रह गरेको बताए । मुलुकको प्रमुख साझेदार निजी क्षेत्रमात्र होइन, सरकार र राज्यका सबै निकाय उत्तिकै जिम्मेवार रुपमा प्रस्तुत हुन आवश्यक छ, सुशासन र भ्रष्टाचार नियन्त्रणमा सरकारले चालेको कदममा सबैको साथ र सहयोगको लागि आग्रह गर्दछु,’ उनले भने ।