स्थानीय मदिरालाई ब्राण्डिङ गर्दै वालिङ

मणी प्रसाद अर्याल 

२२ मंसिर, वालिङ । स्याङ्जाको वालिङ नगरपालिकाले स्थानीय मदिरालाई ब्राण्डिङ गर्ने भएको छ । मंगलबार बसेको जनप्रतिनिधि,कर्मचारीहरुको  र विज्ञबीच छलफल भएको हो  । स्थानीय उत्पादनलाई प्राथमिकता दिँदै नागरिकलाई स्वरोजगारको कार्यक्रमसँग जोड्न नगरपालिकाले घरेलु मदिरालाई ब्राण्डिङ गर्ने नगरप्रमुख कृष्ण खाँणले बताए ।

उनले यसबाट नगरको आर्थिक समृद्धिमा सघाउ पुग्ने विश्वास लिँदै नगरको पहिचान स्थापना समत हुने उल्लेख गरे। घरेलु मदिरालाई ब्राण्डिङ र लेबलिङ गर्ने कार्यले नगरमा करको दायरा वृद्धि हुने र ग्रामीण तहका नागरिकलाई आत्मनिर्भर बन्ने वातावरण हुने स्पष्ट पारे । 

अन्तरक्रिया कार्यक्रममा नगर उपप्रमुख कविता तिवारी गैहेले राज्यले अवैध मानेको घरेलु मदिरालाई ब्राण्डिङ गर्दा प्रति परिवार प्रति महिना १५ हजारदेखि १८ हजारसम्म आम्दानी बढ्ने बताइन् । यसबाट १५ सय घरधुरी लाभान्वित हुने उल्लेख गर्दै सीपको विकास नगरको करको दायरा समेत फराकिलो बन्ने  जानकारी दिइन् ।

स्थानीय तवरले उपलब्ध आँप,लिची, चिउरी,बेलौती जस्ता फलफूलहरुको उपयोग गरी मदिरा उत्पादन हुँदै आएकामा तिनलाई खेर जान नदिन मदिरा उत्पादन गरिने नगरपालिकाले जनाएको छ ।