क्षेत्रबहादुरको घरमा क्रिसमसको सामूहिक भोज, १ जनाको मृत्यु, १८ बिरामी अस्पतालमा

२४ मंसिर, पोखरा । लमजुङमा सामूहिक भोज खाएका मध्ये १ जनाको मृत्यु भएको छ भने १८ जना बिरामी परेका छन् । सुन्दरबजार नगरपालिका–९ की देवी परियारको अस्पताल लैजाँदै गर्दा बाटोमा नै मृत्यु भएको हो ।
 
लमजुङ प्रहरीले दिएको जानकारी अनुसार स्थानीय क्षेत्रबहादुर गुरुङको घरमा क्रिसमसको उपलक्षमा राखिएको सामूहिक भोजमा उनीहरू सहभागी भएका थिए । भोजमा ३५ जना सहभागी भएकोमा १८ जनालाई समस्या देखिएको हो ।  बिरामीलाई सुन्दरबजारको एचडिसिएस नमुना सामुदायिक अस्पतालमा भर्ना गरिएको छ ।
 
शुक्रवार भोज खाएका उनीहरूलाई शनिबारदेखि समस्या देखिन थालेको लमजुङ प्रहरीले जानकारी दिएको छ । सुरुमा घरमै उपचार गरिए पनि स्थिति सुधार नभएपछि उनीहरूलाई अस्पताल भर्ना गरिएको प्रहरीको भनाई छ । 
 
भोजमा सहभागीहरूले दाल, भात, कुखुराको मासु र मुलाको अचार खाएको स्थानीयले बताएका छन् ।  कुन खानामा समस्या आएको भन्ने खुलेको छैन । कुन खानेकुरा कहाँबाट किनेर ल्याएको थियो भन्ने अहिले खोजि भइरहेको छ । सुरुवा भोज खाएकाहरूलाई पखाला लागेको पछि ज्वरो आएको अस्पतालको भनाइ छ ।