शेखरले बैठक बोलाइसके, देउवा अझै छलफलमा

२४ मंसिर, काठमाडौं । महासमितिको बैठकलाई लिएर कांग्रेस सभापति देउवा र नेता शेखर कोइराला समूह दुविधामा परेको छ । कोइरालाले महासमिति र राष्ट्रियसभाका निर्वाचनलाई लिएर समूहको बैठक मंगलबार बोलाइसकेका छन् । सभापति देउवा पनि कार्यसम्पादन समितिको बैठक बोलाएर महासमिति बैठक सार्ने तयारीमा छन् । उनले  मंगलबार अघि  नै कार्यसम्पादन समितिको बैठक बोलाउने हुनकि भन्ने चिन्ता कोइराला समूहमा देखिएको छ ।

नेपाली कांग्रेसका सभापति शेरबहादुर देउवाले आगामी महासमितिको बैठक सानुपर्ने विषयमा छलफल चलाएपछि यसैलाई लक्षित गरेर शेखर कोइराला समूहले बैठक बोलाएको हो । बैठकमा पदाधिकारीसहित १४औँ महाधिवेशनमा उमेदवार बनेका सबै नेताहरूलाई बोलाइएको बताइएको छ । 

महासमितिको बैठकमा सार्न सभापति शेरबहादुर देउवाले पदाधिकारी सदस्यहरुलाई भनेपछि फागुन दोस्रो सातासम्म महासमितिको बैठक सर्नसक्ने सम्भावना देखिएको छ । राष्ट्रियसभाको निर्वाचनका लागि उम्मेदवारहरू छनोट गर्नुपर्ने समय आएकाले शेखर समूहको बैठक राष्ट्रिय सभाका उम्मेदवारमा केन्द्रित हुने नेताहरूले बताएका छन् ।

यसअघि मंसिर १३ देखि १५, मंसिर २९ देखि पुस २ र पुस १६ देखि १९ सम्मका लागि गरी तीन पटक मिति तोकिएको थियो । तर सभापति देउवाले जाडोको समयमा महासमिति बैठक नगरौँ भन्दै फागुनमा गर्दा हुँदैन भन्न थालेको छन् । यसको अर्थ बैठक सानुपर्छ भन्नेनै हो, एक नेताले नेपालबहसलाई बताए । 

अब बस्ने कार्यसम्पादन समितिको बैठकले महाससिमतिको बैठकको नयाँ मिति तय गर्ने ति नेताले बताए । सभापति देउवाले फागुनमा महासमिति बैठक गर्न चाहेका छन । आइतबार पार्टी कार्यालय आयोजित कार्यक्रममा महामन्त्री गगन थापाले पनि पार्टी कार्यक्रमहरू अन्य परिस्थितिले पनि समयमै गर्न नसकिने अवस्था आइरहेको बताएका थिए । 

पार्टी विधान अनुसार महाधिवेशन नभएको वर्षमा महासमिति बैठक गर्नुपर्ने व्यवस्था छ । यसपटकको महासमिति बैठकलाई ‘नीति महाधिवेशन’का रुपमा गर्ने कांग्रेसले निर्णय गरेको छ । महासमिति बैठकका लागि निर्वाचन समितिले १६५ संघीय निर्वाचन क्षेत्रमध्ये २४ क्षेत्र बाहेकमा प्रतिनिधि छनोट गरेको छ ।  अब २४ क्षेत्रमा प्रतिनिधि छनोट हुन नसकेको अवस्था छ । 

देउवाले सोमबार नै कार्यसम्पादन समितिको बैठक बोलाए भने शेखर समूहको बैठक के गर्ने भन्ने पनि छ तर, राष्ट्रियसभाका विषयमा छलफल गर्नुपर्ने भएकाले देउवाले बैठक बोलाए पनि फरक नपर्ने ति नेताले बताए । कांग्रेसको महासमिति बैठक पुस १६ देखि १९ सम्मका लागि तय गरिएको छ ।

 शेखरले नेताहरूलाई बैठकमा आउन भनिसकेकाले कोइराला समूहको बैठक नसर्ने एक नेताको भनाइ छ । उनले भने शेखर दाइले बैठक राखेर सबैलाई निम्ता दिइसक्नु भयो । देउवाले कार्यसम्पादनको बैठक बोलाएकै छैनन् । यस अर्थले केही फरक पर्दैन । सभापति देउवाले कार्यसम्पादनको बैठक राखेर औपचारिक रुपमा महासमिति बैठक सार्ने लगभग पक्का जस्तै भएको छ ।