कारण नखुलाई राजनीतिक सल्लाहकारबाट गजुरेलले दिए राजीनामा

२४ मंसिर, काठमाडौं । प्रधानमन्त्री पुष्पकमल दाहाल प्रचण्डका प्रमुख राजनीतिक सल्लाहकार हरिबोल गजुरेलले राजीनामा दिएका छन् । प्रधानमन्त्रीको प्रमुख राजनीतिक सल्लाहकारको पदबाट मंसिर २० गते नै राजीनामा दिएको गजुरेलले जानकारी दिए ।

आफूले राजीनामा दिए पनि स्वीकृत भएको जानकारी प्राप्त भइनसकेको गजुरेलले बताए । २० गते बिहान मैले पदबाट राजीनामा दिएको हो । त्यसपछि सिंहदरबार पनि गएको छैन,’ उनले भने ।

प्रधानमन्त्रीसँग व्यक्तिगत असन्तुष्टि वा अन्य पद प्राप्त गर्नका लागि राजीनामा नभएको गजुरेलले बताए । मेरो राजीनामा व्यक्तिगत असन्तुष्टि र पदको लाभको अपेक्षाका लागि होइन । मैले राजीनामाको कारण स्पष्ट रूपमा लेखेको छु । त्यो स्वीकृत भएसँगै कारण सार्वजनिक होला,’ उनले भने ।

गजुरेल पूर्वमन्त्री पनि हुन् । उनी प्रतिनिधिसभाको गत मंसिरको निर्वाचनमा उम्मेदवारका लागि टिकट पाएका थिएनन् । प्रधानमन्त्री गत माघ ९ मा गजुरेललाई प्रमुख राजनीतिक सल्लाहकार बनाएका थिए ।