समयमा काम सम्पन्न नगर्ने १४ निर्माण कम्पनी कालोसूचीमा

२५ मंसिर, काठमाडौं । सरकारले तोकिएको काम समयमा नै सम्पन्न नगर्ने १४ निर्माण कम्पनीहरुलाई कालो सूचीमा राखेको छ । प्रधानमन्त्री तथा मन्त्रिपरिषद् कार्यालय अन्तर्गतको सार्वजनिक खरिद अनुगमन कार्यालयले विभिन्न सार्वजनिक निकायहरुले लेखी पठाएको आधारमा १२ कम्पनीहरूलाई कालोसूचीमा राखेको हो ।

ती कम्पनीहरु ३ वर्षदेखि १ वर्षसम्म कालोसूचीमा परेका छन् । कालो सूचीमा परेकाहरुले कालो सूचीमा राखिएको अवधिभर सार्वजनिक निकायको कुनै पनि खरिद कारबाहीमा भाग लिन पाउँदैनन् । सार्वजनिक खरिद तथा अनुगमन कार्यालयले सार्वजनिक निकायले कालोसूचीमा राख्न सिफारिस गरेअनुसार उक्त कम्पनीहरुलाई कालोसूचीमा राखेको हो ।

इलाम नगरपालिकाको सिफारिसमा वावरी निर्माण सेवालाई १ वर्ष ६ महिनाको लागि कालोसूचीमा राखिएको छ । त्यस्तै, सडक डिभिजन दाङको सिफारिसमा नेपालगञ्जको गंगोत्री देवी निर्माण सेवालाई पनि दुई वर्ष कालोसूचीमा राखिएको छ ।

रतुवामाई नगरपालिकाको सिफारिसमा गोलबजार– सिराहा ठेगाना रहेको आदर्श कन्स्ट्रक्सन कम्पनीलाई तीन वर्ष कालोसूचीमा राखेको छ । त्यस्तै सडक विभाग योजना तथा अनुगमन शाखा ललितपुरको सिफारिसमा त्रिवेणी निर्माण सेवालाई दुई वर्ष कालोसूचीमा राखेको छ ।

त्यस्तै, प्रान्जल, रोहित, पारस, रुमानी निर्माण सेवालाई १ वर्षको लागि कालोसूचीमा राखिएको छ । कालोसूचीमा राखिएको अवधिभर सार्वजनिक निकायको कुनै पनि खरिद कारबाहीमा भाग लिन नसक्ने कार्यालयले जनाएको छ । पाँचथरको कमल कन्स्ट्रक्सन, बाँकेको अनामिका कन्स्ट्रक्सन, कोहालपुर बाँकेको भावेश कन्स्ट्रक्सन, काठमाण्डौं, टेकुको ऊर्जा–कृशभ मस्ट जेभीलाई १ वर्ष ६ महिनाको लागि कालोसूचीमा राखिएको छ ।